एजेन्सी – राइली रोसोउको शतक र एनरिच नोर्किया उत्कृष्ट बलिङमा दक्षिण अफ्रिकाले आइसिसी टि२० विश्वकपमा बंगलादेशमाथि १ सय ४ रनको सानदार जित हात पारेको छ । योसँगै सुपर १२ को समूह बी मा दक्षिण अफ्रिका शीर्ष स्थानमा उक्लिएको छ ।

जितको लागि २ सय ६ रनको विशाल विजयी लक्ष्य पछ्याएको बंगलादेश १६.३ ओभरमा १ सय १ रनमा अल आउट भयो । बंगलादेशका ओपनर लिटन दासले ३१ बलमा १ चौका र १ छक्कासहित सर्वाधिक ३४ रन बनाए । बंगलादेशले सुरुवाती दुई ओभरमा राम्रो सुरुवात गरेको थियो ।

तेस्रो ओभरको पहिलो बलमै एनरिच नोर्कियाले सौम्य सरकारलाई क्विन्टन डि ककबाट १५ रनमा क्याच गराए । ६ बल खेलेका सरकारले २ छक्का हाने । तीन बलपछि नाज्मुल हसन शान्टोलाई ९ रनमा बोल्ड गरे । नोर्कियाले सकिब अल हसनलाई एक एक रनमा एलबीडब्लू आउट गर्दै फराकिलो जिततर्फ अघि बढाए ।

कागिसो रबाडाले अफिफ हुसैनलाई एक रनमा आउट गरे । मेहदी हसन मिराज ११, मोसाद्देक हसन शून्य, नुरुल हसन २ र हसन मोहम्मद शून्यमा आउट भए । तस्किन अहमद १० र मुश्ताफिजुर रहमानले ९ रन बनाए ।

दक्षिण अफ्रिका एनरिच नोर्कियाले ३.३ ओभरमा १० रन खर्चेर ४ विकेट लिए । स्पिनर तबरेज शाम्सीले ४ ओभरमा २० रन खर्चेर ३ विकेट लिए । कागिसो रबाडा र केशव महाराजले एक एक विकेट लिए ।

त्यसअघि सिड्नी क्रिकेट ग्राउन्डमा टस जितेर पहिला ब्याटिङ थालेको दक्षिण अफ्रिकाले निर्धारित २० ओभरमा ५ विकेट गुमाउँदै २ सय ५ रन बनाएको थियो ।

दक्षिण अफ्रिकका लागि राइली रोसोउले ५६ बलमा ७ चौका र ८ छक्कासहित १ सय ९ रनको सानदार शतकीय इनिङ खेले । उनले ५२ बलमा आफ्नो टि२० आई करिअरको दोस्रो शतक हाने ।

उनी दक्षिण अफ्रिकाबाट टि२० आई विश्वकपमा शतक हान्ने पहिलो खेलाडी बनेका छन् । उनको यो लगातार दोस्रो शतक समेत हो । यसअघि भारतविरुद्ध गत अक्टोबरमा १ सय रनको शतकीय इनिङ खेलेका थिए ।

ओपनर तथा विकेटकिपर क्विन्टन डि कक ३८ बलमा ७ चौका र ३ छक्कासहित ६३ रनमा आउट भए । दोस्रो विकेटका लागि डि कक र रोसोउले १ सय ६३ रनको साझेदारी गरे । विश्वकप इतिहासमा यो दोस्रो उच्च साझेदारी हो । यसअघि टि२० विश्वकपमा २०१० मा श्रीलंकाका कुमार संगाकारा र महेला जयवर्धनेले वेस्टइन्डिजविरुद्ध दोस्रो विकेटका लागि १ सय ६६ रनको साझेदारी गरेका थिए ।

तीव्र गतिका बलर तस्किन अहमदको पहिलो ओभरको अन्तिम बलमा कप्तान टेम्बा बभुमा २ रनमा क्याच आउट भए । अफिफ हुसैनको १५ औं ओभरको तेस्रो बलमा ठूलो सटको चक्करमा डि कक लङअफमा सौम्य सरकारबाट क्याच आउट भए । डि कक आउट भएपछि रनको गती घटेको थियो ।

ट्रिस्टन स्टब्स सकिब अल हसनको बलमा ठूलो सटको चक्करमा डिप मिडविकेटमा ७ रनमा क्याच आउट भए । शतकधारी रोसोउ सकिबको १९ औं ओभरको तेस्रो बलमा कभरमा लिटन दासबाट क्याच आउट भए । एडेन माक्ररम १० र डेविड मिलरले २ रन बनाए ।

बंगलादेशका स्पिनर सकिब अल हसनले ३ ओभरमा ३३ रन खर्चेर २ विकेट लिए । तस्किन अहमद, हसन मोहम्मद र अफिफ हुसैनले एक एक विकेट लिए ।

अंक तालिका :

सुपर १२ को समूह ए मा न्युजिल्यान्ड २ खेलमा ३ अंकका साथ शीर्ष स्थानमा छ । श्रीलंका, इंग्ल्यान्ड, आयरल्यान्ड र अष्ट्रेलियाले एक खेलमा जित र एक खेलमा हारका साथ २-२ अंक जोडेका छन् ।

नेटरनरेटको कारण श्रीलंका दोस्रो, इंग्ल्यान्ड तेस्रो, आयरल्यान्ड चौथो र अष्ट्रेलिया पाँचौं स्थानमा छन् । अफगानिस्तान २ खेलमा १ अंकका साथ पुछारमा छ ।

दक्षिण अफ्रिका २ खेलमा १ मा जित र १ मा अंक बाड्दै ३ अंकका साथ सुपर १२ को समूह बी मा शीर्ष स्थानमा छ । दक्षिण अफ्रिकाले पहिलो खेलमा जिम्बावेसँग वर्षाको कारण अंक बाँडेको थियो । दक्षिण अफ्रिकाले अव आइतबार भारतसँग खेल्नेछ । शीर्ष दुईमा रहँदै सेमिफाइनल खेल्न उक्त खेलमा जित्नुपर्ने दबाब हुनेछ ।

भारत भने १ खेलमा २ अंकका साथ दोस्रो स्थानमा छ । बंगलादेश २ खेलमा १ मा जित र १ मा हार र १ मा जित सहित तेस्रो स्थानमा छ । जिम्बावे एक अंकका साथ चौथो, पाकिस्तान र नेदरल्यान्ड्स अंक विहीन हुँदै पुछारमा छन् ।