धादिङ(हाम्रो खेलकुद) – कप्तान तथा ओपनर अमृत थापाको उत्कृष्ट ब्याटिङमा त्रिपुरासुन्दरी गाउँपालिकाले धादिङ क्रिकेट लिगको उपाधि जितेको छ । सोमबार फाइनलमा त्रिपुरासुन्दरीले धुनीबेसी नगरपालिकालाई चार विकेटले हराउँदै उपाधि जितेको छ ।

च्याम्पियन त्रिपुरासुन्दरीले १ लाख ३० हजार र उपविजेता धुनीबेसीले ५७ हजार रुपैयाँ प्राप्त गरेका छन् । बिशालटारको चन्द्रोदय खेल मैदानमा भएको फाइनल खेलमा टस जितेर ब्याटिङ रोजेको धुनीबेसीले निर्धारित २० ओभरमा ७ विकेट गुमाउँदै १ सय १२ रन बनायो ।

धुनीबेसीका ओपनर कौशल रुपाखेतीले ५९ रन ७ चौका र ५ छक्काको सहित सर्वाधिक ७६ रनको योगदान दिए । तर त्यो जित पर्याप्त हुन सकेन । संस्कार पाठकले १२ रन बनाए। अन्य ब्यटरको प्रदर्शन सम्झन लायक रहेन।

त्रिपुरासुन्दरीका तीव्र गतिका बलर विशाल थपलियाले ४ ओभरमा १५ रन खर्चिएर २ विकेट लिए । बुबा र छोराको जोडीले ३ विकेट लिए। बुबा उदय थापाले २ विकेट लिए । छोरा अमृत थापाले १ विकेट लिए।

जितको लागि १ सय १३ रनको विजयी लक्ष्य पछ्याएको त्रिपुरासुन्दरी गाउँपालिकाले १९.१ ओभरमा ६ विकेट गुमाउँदै पूरा गर्यो । अन्तिम ओभरमा पाँच रन चाहिँदा अमृतले पहिलो बलमा चौका र त्यसपछि वाइको रुपमा चौका गएपछि खेल सकिएको थियो ।

कप्तान अमृतले ५८ बलमा ७ चौका र ६ छक्कासहित सर्वाधिक ७६ रनको योगदान दिए । अन्य ब्याटरको भने प्रदर्शन राम्रो हुन सकेन ।

धुनीबेसीका सुनिल बानियाले ४ ओभरमा २५ रन खर्चिएर २ विकेट लिए । समिर तिमल्सिनाले पनि २ विकेट लिए।