एजेन्सी – पाकिस्तानले आइसिसी टि२० विश्वकपमा भारतविरुद्ध बलिङतर्फ उत्कृष्ट सुरुवात गरेको छ । जितको लागि १ सय ६० रनको प्रतिस्पर्धात्मक विजयी लक्ष्य पछ्याएको भारतले ४ ओभरमा २ विकेट गुमाउँदै १७ रन बनाएको छ ।

भारतका ओपनर रोहित शर्मा र लोकेश राहुल दुबै सुरुवातमै आउट भएका छन् । सूर्य कुमार यादव ७ र विराट कोहली २ रनमा क्रिजमा छन् ।

तीव्र गतिका बलर नसिम शाहले ओपनर लोकेश राहुललाई दोस्रो ओभरको पाँचौं बलमा ४ रनमा बोल्ड गरे । अर्का तीव्र गतिका बलर हरिस रौफको बलमा रोहित शर्मा एज लागेर फस्ट स्लिपमा इफित्खार अहमदले ४ रनमै क्याच भएपछि पाकिस्तानले उत्कृष्ट सुरुवात गरेको हो ।

त्यसअघि मेलबर्न क्रिकेट ग्राउन्डमा टस हारेर पहिला ब्याटिङको निम्तो पाएको पाकिस्तानले निर्धारित २० ओभरमा ८ विकेट गुमाउँदै १ सय ५९ रन बनायो । पाकिस्तानको लागि शन मकसुद ४२ बलमा ५ चौका सर्वाधिक ५२ रनमा अविजित रहे । इफ्तिखार अहमद ३४ बलमा २ चौका र ४ छक्कासहित ५१ रनमा आउट भए ।

खराब सुरुवात गरेपनि तेस्रो विकेटका लागि अहमद र मकसुदले ५० बलमा ७६ रनको साझेदारी गर्दै पाकिस्तानलाई खेलमा फर्काएका थिए । तीव्र गतिका बलर मोहम्मद शामीले इफ्तिखर अहमदलाई एलबीडब्लू आउट गर्दै साझेदारी तोडेका थिए । त्यसपछिका ब्याटरले भने राम्रो प्रदर्शन गर्न सकेनन् ।

भारतका युवा तीव्र गतिका बलर अर्शदीप सिंहले ४ ओभरमा ३२ रन खर्चेर ३ विकेट लिए । हार्दिक पान्ड्याले ४ ओभरमा ३० रन खर्चेर ३ विकेट लिए । मोहम्मद शामीले ४ ओभरमा २५ रन खर्चेर १ विकेट लिए । भुवनेश्वर कुमारले एक विकेट लिए ।