एजेन्सी – आयरल्यान्डले दुई पटकको च्याम्पियन वेस्ट इन्डिजलाई ९ विकेटले हराउँदै आईसीसी टि२० विश्वकपको सुपर १२ मा पुगेको छ ।

जितको लागी १ सय ४७ रनको विजयी लक्ष पच्याएको आयरल्यान्डले १७.३ ओभरमा १ विकेट गुमाउँदै पुरा गर्यो ।

आयरल्यान्डका पउल स्टर्लिङ ४८ बलमा ६ चौका २ छक्का सहित ६६ रनमा अविजित रहे । लोर्कान टर्करले ३५ बलमा २ चौका र २ छक्का सहित ४६ रनमा अविजित रहे ।

पहिलो विकेटका लागि कप्तान एन्ड्रयु बालबिर्नी र पउल स्टर्लिङले ७.३ ओभरमा ७३ रनको साझेदारी गर्दै सानदार सुरुवात दिलाए । बलबार्नी २३ बलमा ३ चौका र ३ छक्का सहित ३७ रनमा आउट भए ।

त्यसअघि होबार्टमा टस जितेर पहिला ब्याटिङ थालेको वेस्ट इन्डिजले निर्धारित २० ओभरमा ५ विकेट गुमाउँदै १ सय ४६ रन बनायो । वेस्ट इन्डिजका ब्रेन्डन किंगले ४८ बलमा ६ चौका र १ छक्कासहित सर्वाधिक ६२ रनमा अविजित रहे । ओडेन स्मिथ १२ बलमा १ चौका र २ छक्का सहित १९ रनमा अविजित रहे ।

ओपनर काइल मेयर्स एक र जोहनसन चार्ल्सले २४ रन बनाए । चार्ल्स १८ बलमा ३ चौका र १ छक्का हाने ।

अनुभवी ब्याटर इविन लेविस १८ बलमा १३ रनमा आउट भए । कप्तान निकोलस पुरन १३ र रोभम्यान पावेल ६ रनमा आउट भए ।

आयरल्यान्डका ग्यारेथ डेलानीले ४ ओभरमा १६ रन खर्चेर ३ विकेट लिए । सिमि सिंह र ब्यारी म्याकर्थीले एक एक विकेट लिए ।

वेस्ट इन्डिज २०१२ र २०१६ को टि२० विश्वकप च्याम्पियन हो । तर पहिलो चरणबाटै बाहिरीएको छ । दोस्रो खेलमा स्कटल्यान्ड र जिम्बावेबीच दिउँसो १ : ४५ मा सुरु हुनेछ । त्यसखेलको नतिजाले समुह विजेता र उप विजेता निर्धारण हुनेछ ।

समूह ए बाट श्रीलंका शीर्ष र नेदरल्यान्ड्स दोस्रो स्थानमा रहँदै सुपर १२ मा पुगेका छन् । श्रीलंका सुपर १२ को समूह ए र नेदरल्यान्ड्स समूह बी मा रहनेछ ।

सुपर १२ को समूह ए मा इंग्ल्यान्ड, अष्ट्रेलिया, न्युजिल्यान्ड, अफगानिस्तान, समूह ए को विजेता श्रीलंका र समूह बी को उपविजेता रहने छन्न । सुपर १२ को समूह बी मा भारत, पाकिस्तान, दक्षिण अफ्रिका, बंगलादेश समूह बी को विजेता र समूह ए को उपविजेता नेदरल्यान्ड् रहनेछन् । सुपर १२ को खेल शनिबार देखी सुरु हुनेछ ।