एजेन्सी – दुई युवा ब्याटर साम करन र ह्यारी ब्रुकको आक्रामक ब्याटिङमा इंग्ल्यान्डले टि२० विश्वकप अघि वार्मअप खेलमा पाकिस्तानलाई ६ विकेटले हराएको छ ।

जितको लागि १ सय ६१ रनको विजयी लक्ष्य पछ्याएको इंग्ल्यान्डले १४.४ ओभरमा ४ विकेट गुमाउँदै पूरा गर्यो । इंग्ल्यान्डको जितमा ह्यारी ब्रुक २४ बलमा २ चौका र ४ छक्कासहित सर्वाधिक ४५ रनमा अविजित रहे । साम करन १४ बलमा २ चौका र ३ छक्कासहित ३३ रनमा अविजित रहे ।

बेन स्टोक्सले १८ बलमा २ चौका र ३ छक्कासहित ३६, फिलिप साल्ट एक र एलेक्स हेल्स ९ रनमा आउट भए । लियाम लिभिङस्टोन १६ बलमा १ चौका र २ छक्कासहित २८ रन जोडे ।

पाकिस्तानका मोहम्मद वासिम जुनियरले २.४ ओभरमा १६ रन खर्चेर २ विकेट लिए । नसिम शाह र शादब खानले एक एक विकेट लिए ।

त्यसअघि ब्रिस्बेनमा टस हारेर पहिला ब्याटिङ थालेको पाकिस्तानले निर्धारित १९ ओभरमा ८ विकेटमा १ सय ६० रन बनायो । पाकिस्तानका शन मकसुदले २२ बलमा ७ चौकासहित ३९, हैदर अली १८, शादब खान १४, इफ्तिखर अहमद २२, खुशदील शाह डक, आसिफ अली १४ र मोहम्मद नवाज १० रनमा आउट भए ।

मोहम्मद वासिमले १६ बलमा ३ चौका र १ छक्कासहित २६ रन बनाए । इंग्ल्यान्डका डेविड विल्लीले सर्वाधिक दुई विकेट लिए ।