पोखरा (हाम्रो खेलकुद) – नेपाल पुलिस क्लबले नवौं राष्ट्रिय खेलकुद अन्तर्गत महिला क्रिकेट प्रतियोगिता दोस्रो सेमिफाइनलमा बागमती प्रदेशलाई १ सय २४ रनको बलियो लक्ष्य दिएको छ ।

पोखरा रंगशालामा टस हारेर पहिला ब्याटिङ थालेको पुलिसले निर्धारित २० ओभरमा ४ विकेट गुमाउँदै १ सय २३ रन बनायो । पुलिसकी ओपनर काजल श्रेष्ठले ५१ बलमा ५ चौकासहित सर्वाधिक ४६ रनमा आउट भइन् ।

अर्की ओपनर कविता कुँवर ३५ बलमा २ चौका र १ छक्कासहित २६ रनमा आउट भइन् । पहिलो विकेटका लागि कविता र काजलले १२.४ ओभरमा ७० रनको साझेदारी गर्दै राम्रो सुरुवात दिलाएका थिए ।

कविता स्पिनर खुशी डंगोलले कवितालाई बोल्ड गर्दै पहिलो सफलता दिलाइन् । लगत्तै अर्को बलमा सम्झन खड्का रन आउट भइन् । अप्सरी बेगम ११ बल खेल्दै ६ रनमा आउट भएकी थिइन् ।

काजल सुमन खतिवडाको बलमा ठूलो सट खेल्ने धुनमा एज लागेर विकेटकिपर कन्चन श्रेष्ठबाट क्याच आउट भएपछि अर्धशतकबाट चुकेकी थिइन् ।

कविता जोशी ९ बलमा १ छक्कासहित १५ रनमा अविजित रहिन् । कप्तान रुविना क्षेत्री १४ बलमा २ चौकासहित १७ रनमा अविजित रहिन् ।

बागमतीको लागि खुशी डंगोल, सुमन खतिवडा र अश्मिना कर्माचार्यले एक एक विकेट लिइन् । विजयी टोलीले फाइनलमा स्वर्णको लागि एपिएफसँग मंगलबार प्रतिस्पर्धा हुनेछ ।