एजेन्सी – दुई पटकको च्याम्पियन वेस्टइन्डिज आइसिसी टि२० विश्वकपमा एसोसियट टोली स्कटल्यान्डसँग ४२ रनले पराजित भएको छ । लज्जास्पद ब्याटिङ गर्दै वेस्टइन्डिज पराजित भएको हो ।

जितको लागि १ सय ६१ रनको विजयी लक्ष्य पछ्याएको वेस्टइन्डिज १८.३ ओभरमा १ सय १८ रनमा अल आउट भयो । वेस्टइन्डिजका जेसन होल्डरले ३३ बलमा ४ चौका र १ छक्का सहित सर्वाधिक ३८ रन बनाए ।

ओपनर काइल मेयर्स १३ बलमा ३ चौका र १ छक्कासहित २०, इभिन लुइस १३ र ब्रेन्डन किंग १७ रनमा आउट भए । कप्तान निकोलस पुरन र उपकप्तान रोभम्यान पावेल ५-५ रनमा आउट भए ।

स्कटल्यान्डका स्पिनर मार्क वाट्टले ४ ओभरमा १२ रन खर्चेर ३ विकेट लिए । ब्राड ह्वाइलले ४ ओभरमा ३२ रन खर्चेर २ विकेट लिए । मार्क लिस्कले ४ ओभरमा १५ रन खर्चेर २ विकेट लिए ।

त्यसअघि होबार्टमा टस हारेर पहिला ब्याटिङको निम्तो पाएको स्कटल्यान्डले निर्धारित २० ओभरमा ५ विकेट गुमाउँदै १ सय ६० रन बनायो ।

स्कटल्यान्डका ओपनर जर्ज मुन्शेले ५३ बलमा ९ चौकासहित सर्वाधिक ६६ रनमा अविजित रहे । अर्का ओपनर माइकल जोन्स १७ बलमा ३ चौकासहित २० रनमा आउट भए ।

म्याथ्यु क्रस ३, कप्तान रिची बेरिंगटनले १६, माइकल लिस्क ४ र क्रिस ग्रेभ्सले १६ रन बनाए । वेस्टइन्डिजका अल्जारी जोशेफले ४ ओभरमा २८ रन खर्चेर २ विकेट लिए । जेसन होल्डरले ३ ओभरमा १४ रन खर्चेर २ विकेट लिए । ओडेन स्मिथले एक विकेट लिए ।

वेस्टइन्डिज २०१२ र २०१६ को टि२० विश्वकप च्याम्पियन हो । यो हारले वेस्टइन्डिजलाई सुपर १२ मा पुग्न बाँकी दुबै खेल जित्नु पर्ने हुन्छ । बुधबार जिम्बावे र शुक्रबार आयरल्यान्ड्सँग खेल्नेछ । स्कटल्यान्डले भने बुधबार आयरल्यान्ड र शुक्रबार जिम्बावेसँग खेल्नेछ ।

समूह ए मा नामिबिया २ अंकका साथ शीर्ष स्थानमा छ । नेदरल्यान्ड्स २ अंक भएपनि नेटरनरेटको कारण दोस्रो स्थानमा छ । युएई तेस्रो र श्रीलंका पुछारमा छ । नामिबियाले मंगलबार नेदरल्यान्ड्स र बिहीबार युएईसँग खेल्नेछ ।

श्रीलंकाले मंगलबार युएई र बिहीबार नेदरल्यान्ड्ससँग खेल्नेछ । पहिलो दिन नामिबियाले श्रीलंकालाई ५५ रनले हराएको थियो । एसिया कप च्याम्पियन श्रीलंका पनि नामिबियासँग स्तब्ध भएपछि बाँकी खेल जित्नुपर्ने दबाब छ ।