पोखरा (हाम्रो खेलकुद) – दक्षिण अफ्रिकाले सानदार बलिङ गर्दै आइसिसी विश्वकप टि२० विश्वकप अघि वार्मअप खेलमा न्युजिल्यान्डमाथि ९ विकेटको सहज जित हात पारेको छ ।

जितको लागि ९९ रनको सामान्य विजयी लक्ष्य दक्षिण अफ्रिकाले ११.२ ओभरमा १ विकेट गुमाउँदै पूरा गर्यो । दक्षिण अफ्रिकाका राइली रोसोउले ३२ बलमा ९ चौका र १ छक्कासहित सर्वाधिक ५४ रनमा अविजित रहे । एडेन माक्ररम १६ रनमा अविजित रहे ।

रिजा हेन्ड्रिक्सले २४ बलमा ४ चौका र १ छक्कासहित २७ रनमा आउट भए । न्युजिल्यान्डका ईश सोधीले एक विकेट लिए ।
त्यसअघि ब्रिस्बेनमा टस हारेर पहिला ब्याटिङको निम्तो पाएको १७.५ ओभरमा ९८ रनमा अल आउट भयो ।

न्युजिल्यान्डका मार्टिन गुप्टिलले २३ बलमा २ चौका र १ छक्कासहित सर्वाधिक २६ रनमा आउट भए । ग्लेन फिलिप्सले १८ बलमा २ चौका र १ छक्कासहित २२ रन बनाए ।

दक्षिण अफ्रिकाको उत्कृष्ट बलिङ सामू न्युजिल्यान्डका ८ खेलाडीले दोहोरो अंकमा रन बनाउन सकेनन् । युवा ब्याटर फिन एलेन ६, कप्तान केन विलियम्सन ३, मार्क च्यापम्यान ४, माइकल ब्रसवेल ११, मिचेल सान्टनार ४ र एडम मिल्नेले ९ रन बनाए ।

दक्षिण अफ्रिकाका केशव महाराजले ३ ओभरमा १७ रन खर्चेर ३ विकेट लिए । वेन पार्नेल र तबरेज शाम्सीले दुई दुई विकेट लिए । त्यस्तै कागिसो रबाडा र एडेन माक्ररमले एक एक विकेट लिए ।