पोखरा (हाम्रो खेलकुद) – बागमती प्रदेशले नवौं राष्ट्रिय खेलकुद अन्तर्गत महिला क्रिकेट प्रतियोगितामा गण्डकी प्रदेशलाई ३० रनले हराउँदै सेमिफाइनल नजिक पुगेको छ । आइतबार मधेश प्रदेशलाई पराजित गर्न सके बागमती समूह बी बाट शीर्ष दुईमा रहँदै सेमिफाइनलमा स्थान बनाउनेछ ।

मधेशसँग पराजित हुँदा भने बाहिरिनेछ । जितको लागि ८९ रनको विजयी लक्ष्य पछ्याएको गण्डकी १९.१ ओभरमा ५८ रनमा अल आउट भयो । गण्डकीको लागि ओपनर सीमना केसीले ३१ बल खेल्दै सर्वाधिक ९ रन बनाइन् । गण्डकीका कुनैपनि खेलाडीले दोहोरो अंकमा रन बनाउन सकेनन् ।

गण्डकीका सुजिता थापा ३, अन्जली विश्वकर्मा ६, कप्तान सृष्टी जैशी ५, शीला क्षेत्री डक, ज्योत्स्निका मरासिनी १, सृजना पौडेल र कुसुम गोदार २२ रनमा आउट भए ।

बागमतीको मध्य गतिकी बलर विपिशा शाहीले ४ ओभरमा ९ रन खर्चेर २ विकेट लिइन् । कप्तान अस्मिना कर्माचार्यले ३.१ ओभरमा २ मेडनसहित ३ रन खर्चेर २ विकेट लिइन् । सोनी पाख्रिन, कृष्मा गुरुङ, आरती बिडारी र संस्कृती फुँयालले एक एक विकेट लिए ।

त्यसअघि पोखरा रंगशालामा टस जितेर पहिला ब्याटिङ थालेको बागमतीले निर्धारित २० ओभरमा ८८ रनमा अल आउट भयो । बागमती प्रदेशको लागि सोनी पाख्रिनले ४१ बलमा २ चौकासहित सर्वाधिक २१ रन बनाइन् ।

बागमतीको सुरुवात सम्झन लायक रहेन । पहिलो ओभरमै तालमेल नमिल्दा ओपनर हेलिसा गुरुङ एक रनमा रन आउट भएकी थिइन् । अर्की ओपनर कन्चन श्रेष्ठ पनि एक रनमा रन आउट भइन् ।

१३ बल खेल्दै विन्दा कटुवाल एक चौकाका साथ कुसुम गोदारको बलमा क्याच आउट भइन् । पाँचौं ओभरको दोस्रो बलमा गण्डकीकी कप्तान सृष्टी पौडेलले बागमतीको प्रमुख ब्याटर सुमन खतिवडालाई ६ रनमा बोल्ड गरेपछि समस्यामा परेको थियो ।

सातौं ओभरमा कप्तान अस्मिना कर्माचार्य सृष्टीकै बलमा विकेटकिपर विकेकिपर ज्यात्स्निका मरासिनीबाट ४ रनमा क्याच भएपछि ६।३ ओभरमा २१–५ को अवस्थामा पुगेको थियो ।

आरती बिडारी १६ बलमा १ चौकासहित ११ रनमा आउट भइन् । छ्रैटौं विकेटका लागि सोनी र आरतीले २९ रनको साझेदारी गरेका थिए । कृष्मा गुरुङ १९ बल खेल्दै ८, विपिन शाही ८ सलिना सिलवाल र संस्कृती फुँयालले २–२ रन बनाए । गण्डकीकी कप्तान सृष्टी जैशीले ४ ओभरमा ११ रन खर्चेर २ विकेट लिइन् । कुसुम गोदार, शीला क्षेत्री, निरु घर्तीथापाले एक एक विकेट लिए ।

अंक तालिका

नेपाल एपिएफ क्लब ३ खेलमा ६ अंकका साथ शीर्ष स्थानमा छ । एपिएफले अन्तिम खेल आइतबार सुदूरपश्चिमसँग खेल्नेछ । एपिएफ सेमिफाइनलमा पुगि सकेको छ । बागमती ३ खेलमा २ मा जित र १ मा हारसहित ४ अंक जोड्दै दोस्रो स्थानमा छ । मधेश ३ खेलमा २ मा जित र १ मा हारसहित ४ अंकका साथ तेस्रो स्थानमा छ ।

आइतवार मधेश प्रदेश र बागमतीबीच प्रतिस्पर्धा हुनेछ । विजयी टोली सेमिफाइनलमा पुग्नेछ । सुदूरपश्चिम ३ खेलमा १ मा जित र २ मा हारका साथ चौथो स्थानमा छ । गण्डकी भने चारै खेलमा पराजित हुँदै जित विहीनका साथ बाहिरियो ।

समूह बी बाट नेपाल पुलिस क्लब विजेता र लुम्बिनी उपविजेता हुँदै बाहिरियो । समूह बी मा नेपाल पुलिस क्लब ३ खेलमा ६ अंकका साथ शीर्ष स्थानमा रह्यो । लुम्बनी ३ खेलमा १ मा जित, १ मा हार र १ खेलमा अंक बाड्दै ३ अंक जोड्दै दोस्रो स्थानमा रह्यो । प्रदेश १ ले ३ खेलमा १ मा जित, १ मा हार र १ खेलमा अंक बाँड्दै ३ अंक भएपनि नेटरनरेटको कारण बाहिरियो ।

लुम्बिनीको नेटरनरेट ०.१७५ र प्रदेश १ को माइनस १.१७५० छ । प्रदेश १ र लुम्बिनीबीचको खेल वर्षाको कारण रद्द भएको थियो । जारी प्रतियोगितामा रद्द हुने यो मात्र एक खेल हो । कर्णाली तीनै खेलमा पराजित हुँदै बाहिरियो ।