एजेन्सी – टि२० विश्वकप २०२२ आइतबारदेखि अष्ट्रेलिया सुरु हुँदैछ । सबै टोली तयारी सकाएर अष्ट्रेलिया पुगेका छन् । टि२० विश्वकपमा हालसम्म ७ संस्करण सकिँदा ६ टोली च्याम्पियन बनेका छन् ।

वेस्टइन्डिज दुई पटक विश्वकप जित्ने एकमात्र टोली हो । लगातार दोस्रो वर्ष टि२० विश्वकप आयोजना हुन लागेको यो सन् २००९ र २०१० पछि पहिलो पटक भएको थियो । २०१६ को विश्वकपपछि पाँच वर्षपछि गतवर्ष टि२० विश्वकप भएको थियो ।

आइसिसीले त्यो संस्करण देखि टि२० विश्वकप चार वर्षमा गर्ने भनेको थियो । तर उक्त निर्णय परिवर्तन गर्ने भन्दै दुई आइसिसीले च्याम्पियन्स ट्रफीको स्थानमा विश्वकप आयोजना गरेको थियो । टि२० विश्वकप २०२० मा अष्ट्रेलियामा हुने भनिएपनि कोरोनाको कारण २०२२ लाई सारिएको थियो ।

२०२२ मा आयोजना हुनुपर्ने विश्वकप भारतले गतवर्ष युएईमा गरेको थियो । टि२० विश्वकप जित्ने ६ टोली र कप्तान यस प्रकार छन् ।

भारत– महेन्द्रसिंह धोनी (२००७)

२००७ मा पहिलो पटक आयोजना भएको विश्वकप भारतले महेन्द्रसिंह धोनीको कप्तानीमा जितेको थियो । दक्षिण अफ्रिकामा भएको उक्त विश्वकपमा भारतले फाइनलमा पाकिस्तानलाई ५ रनले हराउँदै उपाधि जितेको थियो ।

समूह चरणमा भारतले पाकिस्तानलाई बल आउटमा ३–० ले हराएको थियो । भारतले विश्वकप जित्दा धोनीको कप्तानीमा गौतम गम्भीर, युसुफ पठान, रोविन उथप्पा, युभराज सिंह, रोहित शर्मा, इफरान पठान र हरभजन सिंह जस्ता खेलाडी थिए ।

पाकिस्तान–युनिस खान (२००९)

इंग्ल्यान्डमा आयोजना भएको २००९ को दोस्रो संस्करणको फाइनलमा पाकिस्तानले श्रीलंकालाई ८ विकेटले हराउँदै विश्वकप उपाधि जितेको थियो ।

पाकिस्तानले उपाधि जित्दा युनिस खान कप्तान थिए । युनिससँगै शाहिद अफ्रिदी, शोएब मलिक, अब्दुल रजाक, मिस्बाउल हक, उमर गुल र मोहम्मद आमिर जस्ता खेलाडी थिए ।

उता श्रीलंकामा त्यो समय कुमार संगकारा, महेला जयवर्धने, सनाथ जयसूर्या, तिलकरत्ने दिलशान, लासिथ मलिङ्गा र अजान्था मेन्डिस जस्ता खेलाडी थिए ।

इंग्ल्यान्ड–केभिन पिटरसन (२०१०)

वेस्टइन्डिजमा आयोजना भएको तेस्रो संस्करणको टि२० विश्वकप इंग्ल्यान्डले जितेको थियो । इंग्ल्यान्डले फाइनलमा अष्ट्रेलियालाई ७ विकेटले हराउँदै उपाधि जितेको थियो । त्यो समय इंग्ल्यान्डको कप्तानी केभिन पिटरसनले गरेका थिए । पिटरसनसँगै ल्यूक वूड, ओईन मोर्गन, स्टुअर्ट बोर्ड जस्ता खेलाडी टोलीमा थिए ।

वेस्टइन्डिज–ड्यारेन शामी (२०१२ र २०१६)

वेस्टइन्डिज टि२० विश्वकप दुई पटक जित्ने एकमात्र टोली हो । वेस्टइन्डिजले २०१२ मा श्रीलंकामा भएको प्रतियोगिता फाइनलमा घरेलु टोलीलाई ३६ रनले हराउँदै उपाधि जितेको थियो ।

त्यो समय विश्वकप जित्दाका क्रिस गेल, ड्यारेन शामी, काइरन पोलार्ड, सुनिल नारायण र मार्नोल सामुएल लगायतका खेलाडी २०१६ मा जित्दा सदस्य पनि हुन् ।

२०१६ मा भारतमा भएको विश्वकपमा ड्यारेन शामीले नै वेस्टइन्डिजको कप्तानी गरेका थिए । २०१६ को फाइनलमा वेस्टइन्डिजले इंग्ल्यान्डलाई ४ विकेटले हराउँदै दोस्रो पटक विश्वकप उपाधि जितेको थियो ।

अन्तिम ओभरमा १९ रन चाहिँदा कार्लोस व्रेथवेटले बेन स्टोक्सलाई लगातार चार छक्का हान्दै अविश्वसनिय उपाधि जिताएका थिए ।

श्रीलंका – लासिथ मलिंगा (२०१४)

२०१४ मा बंगलादेशमा भएको श्रीलंकाले फाइनलमा भारतलाई ६ विकेटले हराउँदै विश्वकप उपाधि जितेको थियो । यसअघिका दुई संस्करणमा फाइनलमा पुगेर पराजित भएपनि तेस्रो पटक भने भारतलाई हराएर च्याम्पियन बनेको थियो ।

तीव्र गतिका बलर लासिथ मलिंगाले कप्तानी गर्दा टोलीमा रंगना हेराथ, जयवर्धने, संगाकारा, तिलकरत्ने दीलशान, थिसरा परेरा जस्ता खेलाडी थिए ।

अष्ट्रेलिया– आरोन फिन्च (२०२१)

गतवर्ष युएई र ओमानमा आयोजना भएको टि२० विश्वकपको उपाधि अष्ट्रेलियाले जितेको थियो । अष्ट्रेलियाले फाइनलमा न्युजिल्यान्डलाई ८ विकेटले हराउँदै विश्वकप उपाधि जितेको थियो ।

अष्ट्रेलियाको कप्तानी आरोन फिन्चले गरेका थिए । अष्ट्रेलियाको टोलीमा आरोन फिन्च, डेविड वार्नर, मिचेल मार्श, मिचेल स्टार्क, प्याट कमिन्स, जोश हेजलवुड, मार्कस स्टोइनिस, म्याथ्यु वेड, ग्लेन म्याक्सवेल र स्टिभ स्मिथ लगायतका खेलाडी थिए ।

अष्ट्रेलियाले गतवर्ष टि२० विश्वकप टोलीबाट एक खेलाडी मात्र परिवर्तन गरेको थियो । गतवर्ष टोलीमा रहेका स्पिनर मिचेल स्वीपसनको स्थानमा टिम डेविडलाई मौका दिएको थियो ।