पोखरा (हाम्रो खेलकुद) – अनुभवी अलराउन्डर नेरी थापाको उत्कृष्ट प्रदर्शनमा नेपाल एपिएफ क्लब नवौं राष्ट्रिय खेलकुद अन्तर्गत महिला क्रिकेट प्रतियोगिताको सेमिफाइनलमा पुगेको छ । एपिएफले मधेश प्रदेशलाई २७ रनले हराउँदै लगातार तेस्रो जितका साथ सेमिफाइनलमा स्थान पक्का गराएको हो ।

जितको लागि १ सय २ रनको विजयी लक्ष्य पछ्याएको मधेश प्रदेश निर्धारित २० ओभरमा ७ विकेट गुमाउँदै ७४ रन बनायो । मधेशको लागि कप्तान सरस्वती कुमारी चौधरीले १५ बलमा १ चौकासहित सर्वाधिक १३ रन बनाइन् । त्यस्तै ओपनर अनुराधा चौधरीले १६ बलमा २ चौकासहित ११ रन जोडिन् ।

स्पिनर नेरीले मधेशकी प्रमुख ब्याटर साना प्रविनलाई दोस्रो ओभरमा ५ रनमा आउट गर्दै मधेशलाई दबाबमा राखेकी थिइन् । नेरीकै बलमा अनुराधा ममता चौधरीबाट क्याच भइन् । नेरीको आठौं ओभरको चौथो बलमा कभरमा सट खेल्न खोजेपनि गोमा आले प्वाइन्टमा रेखा रावलबाट शून्यमा क्याच भएसँगै मधेशको जितको सम्भावना टाढिएको थियो ।

एलिसा यादव ५, शान्ति चौधरी ७ र पुष्पा फुँयाल ५ रनमा आउट भइन् । कविता गौतम २४ बलमा १ चौकासहित १३ रनमा अविजित रहिन् । शन्तोषी चौधरी ५ रनमा अविजित रहिन् ।

नेपाल एपिएफ क्लबकी नेरी थापाले ४ ओभरमा १ मेडनसहित ६ रन खर्चेर ३ विकेट लिइन् । सुमन विष्ट, इन्दु बर्मा, सुष्मा श्रेष्ठ र सरिता मगरले एक एक विकेट लिइन् ।

त्यसअघि पोखरा रंगशालामा टस जितेर पहिला ब्याटिङ थालेको नेपाल एपिएफ क्लबले निर्धारित २० ओभरमा ७ विकेट गुमाउँदै १ सय ७ रन बनाएको थियो । एपिएफको लागि सातौं नम्बरकी ममता चौधरीले २३ बलमा १७ रन बनाइन् । राजमति ऐरीले सर्वाधिक १६ रन बनाइन् ।

ज्योति पाण्डेले १३ बलमा २ चौकासहित सर्वाधिक १५ रन बनाइन् । एपिएफको लागि ज्योतिले दुई, राजमति र सीता रानामगरले एक एक चौका प्रहार गरे । अन्य खेलाडीले बाउन्ड्री प्रहार गर्न सकेनन् । मधेशको लागि माछापुच्छ्रे एन्डबाट सरस्वतीले लगातार उत्कृष्ट बलिङ गर्दै दबाबमा राखिन् ।

एपिएफले आजको खेलमा ओपनिङ जोडी परिवर्तन गर्दै इन्दु बर्मा र राजमती ऐरीलाई पठाएको थियो । नियमित ओपनर ज्योतिलाई भने आठौं नम्बरमा खेलाएको थियो । सरस्वतीको चौथो ओभरको दोस्रो बलमा इन्दु एज लागेर विकेटकिपर एलिसा यादवबाट ६ रनमा क्याच भइन् । यसै ओभरको पाँचौं बलमा सरिता मगर शून्यमा एलिसाबाट क्याभ भइन् । सरिता पनि सट बलमा एज लागेर क्याच हुन पुगेकी थिइन् ।

आठौं ओभरको पाँचौं बलमा स्पिनर शान्ति चौधरीले ओपनर राजमतीलाई १६ रनमा बोल्ड गरिन् । ऐरीले २३ बलमा १ चौका प्रहार गरिन् । शान्तिले नै कप्तान सरिता मगरलाई ८ रनमा बोल्ड गरेपछि एपिएफ ४५–४ को अवस्थामा थियो । लगत्तै ११ औं ओभरको तेस्रो बलमा रोमा थापा ८ रनमा क्याच भइन् । रोमा पनि १८ बल खेल्दै एलिसाबाटै क्याभ भइन् ।

सरस्वतीले नेरी थापालाई १२ रनमा बोल्ड गरेपछि १५.२ ओभरमा ७१–६ को अवस्थामा पुगेको थियो । मधेशकी सरस्वती कुमारी चौधरीले ४ ओभरमा १ मेडनसहित ११ रन खर्चेर ३ विकेट लिइन् । शान्ति चौधरीले ४ ओभरमा २८ रन खर्चेर २ विकेट लिइन् । कप्तान कविता गौतमले ४ ओभरमा रन खर्चे २ विकेट लिइन् ।

अंक तालिका

नेपाल एपिएफ क्लब ३ खेलमा ६ अंकका साथ शीर्ष स्थानमा छ । एपिएफले अन्तिम खेल आइतबार सुदूरपश्चिमसँग खेल्नेछ । मधेश ३ खेलमा २ मा जित र १ मा हारसहित ४ अंकका साथ दोस्रो स्थानमा छ । मधेशले आइतबार बागमतीसँग खेल्नेछ । उक्त खेलमा विजयी भएमा दोस्रो स्थानमा रहँदै सेमिफाइनलमा पुग्नेछ । पराजित भएमा बागमती र सुदूरको नतिजामा भरपर्नेछ ।

बागमती २ खेलमा १ मा जित र १ मा हारसहित २ अंक जोड्दै तेस्रो स्थानमा छ । आजनै बागमतीले गण्डकीसँग खेल्नेछ । आइतवार मधेश प्रदेशसँग खेल्नेछ । दुबै खेलमा विजयी हुँदा सेमिफाइनलमा पुग्नेछ । सुदूरपश्चिम ३ खेलमा १ मा जित र २ मा हारका साथ चौथो स्थानमा छ । गण्डकी भने तीनै खेलमा पराजित हुँदै प्रतियोगिताबाट बाहिरिएको छ ।

समूह बी बाट नेपाल पुलिस क्लब विजेता र लुम्बिनी उपविजेता हुँदै बाहिरियो । समूह बी मा नेपाल पुलिस क्लब ३ खेलमा ६ अंकका साथ शीर्ष स्थानमा रह्यो । लुम्बनी ३ खेलमा १ मा जित, १ मा हार र १ खेलमा अंक बाड्दै ३ अंक जोड्दै दोस्रो स्थानमा रह्यो । प्रदेश १ ले ३ खेलमा १ मा जित, १ मा हार र १ खेलमा अंक बाँड्दै ३ अंक भएपनि नेटरनरेटको कारण बाहिरियो ।

लुम्बिनीको नेटरनरेट ०।१७५ र प्रदेश १ को माइनस १.१७५० छ । प्रदेश १ र लुम्बिनीबीचको खेल वर्षाको कारण रद्द भएको थियो । जारी प्रतियोगितामा रद्द हुने यो मात्र एक खेल हो । कर्णाली तीनै खेलमा पराजित हुँदै बाहिरियो ।