एजेन्सी – भारतीय पूर्व कप्तान सचिन तेन्दुलकरका छोरा अर्जुनले शैद मुश्ताक अली ट्रफीमा गोवाबाट हैदराबादविरुद्ध सानदार बलिङ प्रदर्शन गरेका छन् । बायाँ हाते तीव्र गतिका बलर अर्जुनले ४ ओभरमा १ मेडनसहित १० रन खर्चेर ४ विकेट लिएका हुन् ।

अर्जुनको यो टि२० करिअरको उच्च प्रदर्शन हो । यसअघि घरेलु क्रिकेट मुम्बईबाट खेलेपनि त्यहाँ पर्याप्त अवसर नपाउँदा अर्जुनले यस सिजनदेखि गोवाबाट खेल्ने निर्णय लिएका हुन् ।

सवाई मानसिंह स्टेडियम, जयपुरमा टस हारेर पहिला ब्याटिङ थालेको हैदराबादले निर्धारित २० ओभरमा ६ विकेट गुमाउँदै १ सय ७७ रन बनाएको थियो । तिलक बर्माले ४६ बलमा ६ चौका र २ छक्कासहित सर्वाधिक ६२ रन बनाए । अर्जुन बाहेक अन्यले राम्रो बलिङ गर्न सकेनन् ।

जितको लागि १ सय ७८ रनको विजयी लक्ष्य पछ्याएको गोवा १८.५ ओभरमा १ सय ४० रनमा अल आउट भयो । आदित्य कौशिकले २२ बलमा ४ छक्कासहित ३३ रन बनाए । हैदराबादका रवि तेजाले ३.५ ओभरमा २० रन खर्चेर ४ विकेट लिए । अर्जुन २ रनमा आउट भए । अर्जुन आक्रामक ब्याटिङको क्षमता पनि राख्छन् ।

अर्जुन इन्डियन प्रिमियर लिग (आइपिएल) मा पछिल्ला दुई सिजनमा मुम्बई इन्डियन्समा रहेपनि डेब्यूको अवसर पाएका छैनन् । भारतले अर्जुनलाई नेट बलरको रुपमा पनि प्रयोग गर्दै आएको छ । शुक्रबार यसै प्रतियोगितामा मुम्बईका कप्तान पृथ्वी शाले आसमविरुद्ध ६१ बलमा १३ चौका र ९ छक्कासहित १ सय ३४ रनको शतकीय इनिङ खेलेका थिए ।

भारतका ३८ जिल्लाबीच प्रतिस्पर्धा हुने यस प्रतियोगिताको प्रदर्शनबाट आइपिएल देखि भारतीय टोलीमा खेलाडी छनोट हुने गर्दछ । आइपिएलमा यो प्रतियोगिता प्रदर्शनलाई नै फ्रेन्चाइज टोली आधार बन्ने गर्दछन् । बिसिसिआईले आइपिएपछि आयोजना गर्ने दोस्रो ठूलो टि२० प्रतियोगिता हो । एकदिवसिय लिष्ट ए मान्यता प्रतियोगिता विजय हजारे र प्रथम श्रेणी मान्यता प्राप्त खेलमा रणजी ट्रफी हुने गर्दछ ।