एजेन्सी – पाकिस्तानले बायाँ हाते आक्रामक ब्याटर फखार जमानलाई आइतबारदेखि अष्ट्रेलियामा सुरु हुने टि२० विश्वकपको लागि टोलीमा बोलाएको छ । स्पिनर उस्मान कादिर घाइते भएपछि फखारले विश्वकपमा स्थान बनाएका हुन् । यसअघि उनी वैकल्पिक खेलाडीको सूचिमा थिए ।

पाकिस्तान फखारबाट शीर्ष र मध्यक्रममा उच्च प्रदर्शनको अपेक्षा गर्नेछ । ओपनर बाबर आजम र मोहम्मद रिजवानले ओपनिङमा उच्च प्रदर्शन गरि रहँदा मध्यक्रम भने चल्न सकेको छैन । फखार, हैदर अली, इफ्तिखर अहमद र शन मकसुदले उच्च प्रदर्शन गर्नुपर्ने हुन्छ । फखार तेस्रो नम्बरमा खेल्नेछन् ।

पाकिस्तानले तीव्र गतिका बलर शाहिन शाह अफ्रिदी र फखार वार्मअप खेलमा उपलब्ध हुने जनाएको छ । फखारले पाकिस्तानबाट ७१ टि० आई खेलमा ८ अर्धशतकसहित १ हजार ३ सय ४९ रन बनाएका छन् । फखार आक्रामक ब्याटिङका लागि चिनिन्छन् ।

पाकिस्तानले पहिलो वार्मअप खेल १७ अक्टोबरमा इंग्ल्यान्ड र १९ अक्टोबरमा अफगानिस्तानसँग खेल्नेछ । पाकिस्तानले टि२० विश्वकपमा भने २३ अक्टोबरमा भारतसँग खेल्दै सुरुवात गर्नेछ । पाकिस्तानलाई सेमिफाइनलमा पुग्न भारत र दक्षिण अफ्रिका मध्य एक टोलीलाई पछि पार्नुपर्ने हुन्छ ।

सन् २००९ मा टि२० विश्वकप जितेको पाकिस्तान दोस्रो उपाधिको सोचमा हुनेछ । बाबर र रिजवानको ब्याटिङमा पाकिस्तान धेरै निर्भर हुनेछ । शाहिन शाह अफ्रिदी, नसिम शाह, हरिस रौफ र मोहम्मद वासिम जुनियर तीव्र गतिका हतियार हुन् ।

पाकिस्तानको विश्वकप खेल्ने टोली :

बाबर आजम (कप्तान), शादब खान (उपकप्तान), आसिफ अली, हैदर अली, हरिस रौफ, इफ्तिखर अहमद, खुशदील शाह, मोहम्मद हसैनन, मोहम्मद नवाज, मोहम्मद रिजवान (विकेटकिपर), मोहम्मद वासिम जुनियर, नसिम शाह, शाहिन शाह अफ्रिदी, शन मकसुद र फखार जमान ।

भ्रमण वैकल्पिक खेलाडी : मोहम्मद हरिस र शहनवाज धानी ।

पहिलो चरणको समूह ए – श्रीलंका, नामिबिया र युएई, नेदरल्यान्ड्स

समूह बी – वेस्टइन्डिज, स्कटल्यान्ड, आयरल्यान्ड र जिम्बावे

सुपर १२ को समूह १ – इंग्ल्यान्ड, न्युजिल्यान्ड, अष्ट्रेलिया, अफगानिस्तानसँगै पहिलो चरणको समूह ए को विजेता र समूह बी को उपविजेता

सुपर १२ को समूह २ – भारत, पाकिस्तान, दक्षिण अफ्रिका, बंगलादेशसँगै पहिलो चरणको समूह बी को विजेता र समूह ए को उपविजेता