एजेन्सी – कुनैपनि टोली च्याम्पियन बन्न ब्याटिङ र बलिङ दुबै बलियो हुनुपर्छ । बलिङ कमाजोर हुँदा जतिसुकै विशाल योगफल बनाउदा पनि जोगाउन मुश्किल पर्छ ।

बलरको प्रदर्शन क्षमतासँगै कन्डिसन र मैदानमा भरपर्छ । कुनै मैदान स्पिनर र कुनै तीव्र गतिका बलरलाई बढी फाइदा हुन्छ । आइतबार देखि अष्ट्रेलियामा सुरु हुने टि२० विश्वकपमा तीव्र गतिका बलरलाई बढी फाइदा पुग्नेछ । हरियो घाँस र पिचको बनाबटले अष्ट्रेलियामा तीव्र गतिका बलर बढी हाबी बन्नेछन् ।

इतिहास देखि नै अष्ट्रेलिया र इंग्ल्सि कन्डिसमा तीव्र गतिका बलरले उच्च प्रदर्शन गर्दै आएका छन् । टि२० विश्वकपमा रहेका सबै बलर, उनीहरुको लय र क्षमता हेर्दा सर्वाधिक विकेट लिनसक्ने पाँच खेलाडी यस प्रकार छन् ।

५. हरिस रौफ (पाकिस्तान)

पाकिस्तानका तीव्र गतिका बलर हरिस रौफलाई अष्ट्रेलिया लक्की मानिन्छ । बिग ब्यास लिगमा सानदार प्रदर्शन गर्दै उनी पाकिस्तानको टोलीमा परेका थिए ।

२८ वर्षीय रौफले पाकिस्तानबाट पछिल्लो समय लगातार उच्च प्रदर्शन गर्दै आएका छन् । विशेषगरी डेथ ओभरमा विकेट लिँदै आएका छन् । उनी योर्करका लागि चिनिन्छन् । १ सय ५५ प्रतिघण्टा किलोमिटरको गतीमा बलिङ गर्ने खुबी भएका उनी पाकिस्तानका प्रमुख बलर हुन् ।

त्यसैले उनको जिम्मेवारी पनि बढी हुनेछ । शाहिन अफ्रिदी चोटका कारण फर्किदा उनलाई केहि कठिन हुनसक्छ । अष्ट्रेलियाको पिच र आफ्नो गतिको फाइदा उठाउँदै उनले उच्च प्रदर्शन गर्न सक्छन् ।

बिग ब्यासमा उनले मेलबर्न स्टार्सबाट २०१९/२० को संस्करणमा रौफले १० खेलमा २० विकेट लिएका थिए । उनको शारीरिक उचाई ५ फिट ११ इन्च हुँदा त्यसको पनि लाभ लिने छन् । उनले ४९ टि२० आई खेलमा ६२ विकेट लिएका छन् । यो वर्ष रौफले १५ खेलमा २१ विकेट लिएका छन् ।

४. ट्रेन्ट बोल्ट (न्युजिल्यान्ड)

न्युजिल्यान्डका तीव्र गतिका बलर ट्रेन्ट बोल्ट सदाबहार मुख्य हतियार हो । बोल्टले पावर प्लेमा स्वीङका साथ लगातार उच्च प्रदर्शन गर्दै आएका छन् । हरेक प्रतियोगितामा बोल्टको प्रदर्शन सानदार हुने गर्दछ ।

न्युजिल्यान्ड औसत टोली भएपनि लगातार ठूला सफलता हात पार्दा बोल्टको योगदान अझ महत्वपूर्ण रहँदै आएको छ । ३३ वर्षीय अनुभवी बायाँ हाते बोल्ट राम्रो लयमा छन् ।

अष्ट्रेलियाको कन्डिसनबारे राम्रोसँग थाहा छ । बोल्टले ४९ टि२० आई खेलमा ६६ विकेट लिएका छन् । बायाँ हाते बलरलाई अझ अतिरिक्त फाइदा पुग्ने गर्दछ । बोल्ट एसियन टोलीविरुद्ध अझ बढी हाबी हुँदै आएका छन् ।

३. वानिन्दु हसरंगा (श्रीलंका)

श्रीलंकाका लेग स्पिनर वानिन्दु हसरंगा प्रमुख हतियार हुन् । बलिङ र ब्याटिङ दुबैमा सानदार प्रदर्शन गर्दै खेल जिताउन सक्छन् । एसिया कप २०२२ को उपाधि जिताउन हसरंगाको प्रदर्शन उत्कृष्ट थियो ।

गत वर्ष टि२० विश्वकपमा हसरंगा ८ खेलमा १६ विकेट लिँदै सर्वाधिक विकेट लिने खेलाडीको सूचिमा शीर्ष स्थानमा थिए । उनको इकोनमी ५.२० थियो । दक्षिण अफ्रिकाविरुद्ध हसरंगाले ह्याट्रिक पनि लिए ।

पछिल्लो दुई वर्ष सानदार प्रदर्शन गर्दै आएका हसरंगा विश्वकपमा पनि विपक्षीलाई घातक बन्नेछन् । एसिया कपको उपाधिपछि श्रीलंका र हसरंगाको मनोबल अझ उच्च छ ।

फाइनलमा पाकिस्तानलाई हराउन हसरंगाले ३६ रन बनाउनुको साथै ३ महत्वपूर्ण विकेट लिएका थिए । राम्रो लयमा रहेका हसरंगा यो विश्वकपमा पनि हाबी बन्नसक्ने खेलाडी देखिन्छन् ।

२. मार्क वुड (इंग्ल्यान्ड)

इंग्ल्यान्डका तीव्र गतिका बलर मार्क वुडको गतिको चाल पाउन विपक्षी बलरलाई कठिन पर्छ । मार्कवुडले १ सय ५० देखि १ सय ५७ प्रतिघण्टा किलोमिटरको गतिमा बलिङ गर्ने गर्दछन् ।

चोटपछि टोलीमा फर्किएका मार्कवुडले सानदार प्रदर्शन गरेका छन् । पछिल्ला तीन टि२० आईमा खेलमा मार्क वुडले ९ विकेट लिएका छन् । जसमा अष्ट्रेलियासँग एक खेल र पाकिस्तानसँग दुई खेल थियो । यसै महिना चोटबाट फर्किएको पहिलो खेलमै सानदार पदर्शन गर्नेक्रममा वुडले १५६ को गतिमा बलिङ गरेका थिए ।

अर्कोतर्फ इंग्ल्यान्ड र अष्ट्रेलियाको कन्डिसनपछि मिल्छ । राम्रो लयमा रहेका मार्क वुड आफ्नो उच्च प्रदर्शनमा इंग्ल्यान्डलाई विश्वकप जिताउने सोचमा हुनेछन् ।

१.जोश हेजलवुड (अष्ट्रेलिया)

विश्व टि२० आई वरियताका शीर्षस्थानका बलर जोश हेजलवुडले लगातार एकरुपताको साथ अन्तर्राष्ट्रिय प्रदर्शन गर्दै आएका छन् । गतवर्ष अष्ट्रेलियालाई टि२० विश्वकप जिताउन हेजलवुडले सानदार प्रदर्शन गरेका थिए । उपाधि जिताउन उनले ७ खेलमा ११ विकेट लिएका थिए ।

हेजलवुडको बलमा स्वींग छ । उनले पावर प्लेमा लगातार उत्कृष्ट प्रदर्शन गर्दै आएका छन् । हेजलवुडको खुबी भनेको नै अनुशासित लाइन एण्ड लेन्थ हो । त्यहिँ लेन्थले उनी लगातार सफल बनाउँदै आएका छन् ।

घरेलु मैदान र समर्थकको फाइदा उठाउँदै विश्वकपमा सानदार प्रदर्शन गर्न सक्छन् । उनले ३६ टि२० आई खेलमा बलमा ५२ विकेट लिएका छन् । फाइनलमा न्युजिल्यान्डविरुद्ध हेजलवुडले ४ ओभरमा १६ रन खर्चेर ३ महत्वपूर्ण विकेट लिएका थिए ।

यो पनि : टि२० विश्वकप जित्न सक्ने सर्वाधिक बलिया पाँच टोली