एजेन्सी – शीर्षक्रमका ब्याटर डेविड मलानको अर्धशतकमा इंग्ल्यान्डले दोस्रो टि२० आई खेलमा घरेलु टोली अष्ट्रेलियालाई १ सय ७९ रनको प्रतिस्पर्धात्मक लक्ष्य दिएको छ ।

मनुका ओभल क्यानवेरामा टस हारेर पहिला ब्याटिङको निम्तो पाएको इंग्ल्यान्डले निर्धारित २० ओभरमा ७ विकेट गुमाउँदै १ सय ७८ रन बनायो । इंग्ल्यान्डका डेविड मलानले ४९ बलमा ७ चौका र ४ छक्कासहित सर्वाधिक ८२ रनको योगदान दिए ।
इंग्ल्यान्डको सुरुवात भने राम्रो हुन सकेन । ओपनर एलेक्स हेल्स ४ र कप्तान जस बटलर १७ रनमा आउट भए । बटलरले १३ बलमा ३ चौका प्रहार गरे ।

एडम जाम्पाले बेन स्टोक्सलाई ४ रनमा बोल्ड गरे । मार्कस स्टोइनिसको बलमा ह्यारी ब्रुक एक रनमा म्याथ्यु वेडबाट क्याच भएपछि इंग्ल्यान्ड ५४–४ को अवस्थामा पुगेको थियो ।

पाँचौं विकेटका लागि मोईन अली र मलानले ९२ रनको उत्कृष्ट साझेदारी गर्दै पूनरागमन गराए । मोईन अली २७ बलमा ४ चौका र २ छक्कासहित ४४ रनमा आउट भइन् । साम करनाई मिचेल स्टार्कले ८ रनमा बोल्ड गरे । क्रिस जोर्डन ७ रनमा अविजित रहे ।

अष्ट्रेलियाका मार्कस स्टोइनिसले ४ ओभरमा ३४ रन खर्चेर ३ विकेट लिए । एडम जाम्पाले ३ ओभरमा २६ रन खर्चेर २ विकेट लिए । मिचेल स्टार्क र प्याट कमिन्सले एक एक विकेट लिए । तीन टि२० आई खेलको सिरिजमा इंग्ल्यान्डले १–० को अग्रता लिएको छ ।