पोखरा (हाम्रो खेलकुद) – विभागीय टोली नेपाल एपिएफ क्लबले नवौं राष्ट्रिय खेलकुद अन्तर्गत महिला क्रिकेट तर्फ समूह ए को खेलमा बागमती प्रदेशलाई पराजित गरेको छ ।

पोखरा रंगशालास्थित क्रिकेट मैदानमा मंगलबार प्रतियोगिताको पहिलो खेल खेलिरहेको एपिएफले बागमतीलाई ४ विकेटले पराजित गरेको हो । बागमतीले प्रस्तुत गरेको ९० रनको लक्ष्य एपिएफले अन्तिम ओभरको पहिलो बलमा पूरा गर्यो । पहिलो खेलमा सुदूरपश्चिमलाई पराजित गरेको बागमती भने दोस्रो खेलमा पराजित हुन पुग्यो ।

टस हारेपछि ब्याटिङको निम्तो पाएको बागमतीले निर्धारित २० ओभरमा ७ विकेटको क्षतिमा ८९ रन जोडेको थियो । टोलीका लागि राष्ट्रिय टोलीकी सदस्य तथा कप्तान अश्मिना कर्मचार्यले नटआउट १९ रनको योगदान दिइन् । राष्ट्रिय टोलीको बन्द प्रशिक्षणमा परिसकेकी सुमन खतिवडाले पनि १९ रन जोडिन् । उनले २ चौका प्रहार गरेकी थिइन् । उनी नेरी थापाको बलमा एलबिडब्लु शिकार भइन् । उनकै आक्रामक ब्याटिङमा बागमतीले पावरप्लेमा ३२ रन जोडेको थियो ।

बागमतीको ४ विकेट रनआउटमा गएको थियो । बागमतीले एपीएफको बलरबाट २० रन एक्स्ट्रा प्राप्त गरेको थियो । ओपनरद्वय अस्मिता खरेल ६ र कन्चन श्रेष्ठ २ रन जोड्दै रनआउट भएका थिए । बिन्दा कटवाल ७ रनमा रनआउट हुँदा आरति बिडारी ७ रनमै इन्दु वर्माको बलमा बोल्ड भइन् ।

हेलिषा गुरुङ ५ रनमा रेखा रावलको बलमा बोल्ड हुँदा अनिशा मझाकोटि १ रनमा खेल्दा रनआउट भइन् । सोनी पाख्रिनले नटआउट ३ रनको योगदान दिइन् । एपिएफका लागि इन्दु, नेरी र रेखाले १-१ विकेट लिए ।

जवाफमा एपिएफका लागि रोमा थापा र ममता चौधरीले पाँचौ विकेटका लागि ३२ रन्को साझेदारी गर्दै जिततर्फ डोर्याए । एक समय १७ रनको स्थितिमा लगातार तीन विकेट गुमाएपछि एपिएफ दबाबमा परेको थियो । कप्तान सीता रानामगरले १० बलमा २ चौका र १ छक्कासहित १६ रन जोडिन् । उनलाई अश्मिनाले तेस्रो ओभरको पाँचौ बलमा बोल्ड गरिन् ।

लगत्तै चौथो ओभरको सुरुवाती २ बलमा ओपनर ज्योति पाण्डे र सरिता मगर (०) पेभेलियन फर्केका थिए । त्यसपछि इन्दु वर्मा ५ रन जोड्दै रनआउट भएपछि एपिएफ समस्यामा परेको थियो । तर रोमा थापाले ३५ बलमा १ चौकाको सहयोगमा २२ रन जोड्दै खेलमा फर्काइन् । उनलाई ममता चौधरीले राम्रो साथ दिएकी थिइन् । ममताले २७ बलमा १७ रनको योगदान दिइन् । रोमा र ममता दुवैलाई २ ओभरको अन्तरमा सुमन खतिवडाले पेभेलियन फर्काइन् ।

नेरी थापाले १८ बलमा १ चौकासहित नटआउट १६ रन जोडेपछि एपिएफ विजयी भयो । अन्तिम ओभरको पहिलो बलमा एपिएफले विजयी रन जोडेको थियो । एपिएफका लागि राजमती ऐरी ४ रनमा नटआउट रहीन् ।

समूह ए अन्तर्गत पहिलो दिन मधेश प्रदेशले गण्डकी प्रदेशलाई ४० रनले पराजित गर्दा बागमतीले सुदूरपश्चिममाथि ८ विकेटको जित दर्ता गरेको थियो । समूह बीमा यसअघि प्रदेश १ र लुम्बिनीको खेल वर्षाका कारण रद्द भएको थियो । पुलिसले भने कर्णालीलाई डीएल पद्दतिबाट ६३ रनले पराजित गरेको थियो ।

आज नै हुने दोस्रो खेलमा समूह ए अन्तर्गत सुदूरपश्चिम र गण्डकी प्रदेश भिड्दैछन् ।