काठमाडौं (हाम्रो खेलकुद) – नेपाली महिला राष्ट्रिय क्रिकेट टोलीकी कप्तान रुविना क्षेत्री बेलबासेको कप्तानीमा नेपाल पुलिस क्लबले नवौं राष्ट्रिय खेलकुद अन्तर्गत महिला क्रिकेट प्रतियोगिता खेल्ने टोली घोषणा गरेको छ ।

पहिलो पटक टिम निर्माण गर्दै घरेलु क्रिकेटमा डेब्यू गर्न लागेको पुलिसले रुविना देखि कविता कुँवर सम्मका स्टार खेलाडीलाई समेट्दै बलियो टोली घोषणा गरेको छ । घोषणा टोलीमा प्रदेश १ र सुदूरपश्चिमबाट घरेलु क्रिकेट खेल्ने खेलाडी छन् ।

पुलिसको टोलीमा रुविना, काजल श्रेष्ठ, हिरन्मई राय, संगिता राई, अप्सरी बेगम र सबनम राई नेपाली टोलीका सदस्य हुन् । यी सबै खेलाडी प्रदेश-१ बाट घरेलु क्रिकेट खेल्ने गर्दछन् । तीव्र गतिकी बलर कविता कुँवर र अलराउन्डर कविता जोशी सुदूरपश्चिबाट रहेका छन् । यी दुबै नेपाली महिला क्रिकेट टोलीका प्रमुख खेलाडी हुन् ।

पुलिसको टोलीमा सम्रगमा ८ नेपाली महिला क्रिकेट टोलीका सदस्य छन् । प्रदेश १ बाट ६ र सुदूरपश्चिमबाट ८ खेलाडी छन् । पुलिसले नवौंको पुरुषतर्फ क्रिकेटको स्वर्ण जितेको छ । अघिल्लो महिना फाइनलमा त्रिभुवन आर्मी क्लबलाई ८ विकेटले हराउँदै पुलिसले स्वर्ण जितेको हो ।

महिलामा भने पहिलो पटक सहभागिता जनाउँदै छ । उता नेपाल एपिएफ क्लबले भने घरेलु क्रिकेटमा एकछत्र राज गर्दै आएको छ । युवा ओपनर रेवती धामी, तीव्र गतिकी बलर ईश्वरी विष्ट, शोभा रोकाया र स्पिनर लक्ष्मी साउदले घरेलु क्रिकेट सुदूरबाट खेल्दै उच्च प्रदर्शन गर्दै आएका छन् । त्यस्तै जन्मथलो सुदूरभएपनि गण्डकीबाट घरेलु क्रिकेट खेल्ने मनिषा स्पिनर हुन् ।

पुलिसले पहिलो खेल सोमबार कर्णाली प्रदेशसँग खेल्दै सुरुवात गर्नेछ । समूह ए मा एपिएफ, मधेश प्रदेश, गण्डकी प्रदेश, सुदूरपश्चिम प्रदेश र बागमती प्रदेश छन् । समूह बी मा नेपाल पुलिस क्लब, कर्णाली प्रदेश, प्रदेश १ र लुम्बिनी प्रदेश छन् ।

सबै खेल पोखरा रंगशालामा हुनेछन् । सेमिफाइनल असोज ३१ र फाइनल कार्तिक एक मा हुनेछ । पहिलो दिन बागमती प्रदेशले सुदूरपश्चिमलाई ८ विकेट तथा मधेशले गण्डकीलाई ४० रनले हराउँदै विजयी सुरुवात गरेका छन् ।

पुलिसको टोली :

रुबिना क्षेत्री बेलबासे (कप्तान), ईश्वरी बिष्ट, काजल श्रेष्ठ (विकेटकिपर), हिरन्मई राय, शोभा रोकाया, लक्ष्मी साउद, कविता कुँवर, कविता जोशी, संगीता राई, अप्सरी बेगम, सम्झना खड्का, मनिषा उपाध्याय, रेवती धामी र सबनम राई ।