एजेन्सी – ओपनर जस बटलर र एलेक्स हेल्सको उत्कृष्ट ब्याटिङमा इंग्ल्यान्डले पहिलो टि२० आई खेलमा घरेलु टोली अष्ट्रेलियालाई २ सय ९ रनको विशाल लक्ष्य दिएको छ । पर्थ स्टेडियममा टस हारेर पहिला ब्याटिङको निम्तो पाएको इंग्ल्यान्डले निर्धारित २० ओभरमा ६ विकेट गुमाउँदै २ सय ८ रन बनायो ।

इंग्ल्यान्डका ओपनर एलेक्स हेल्सले ५१ बलमा १२ चौका र ३ छक्कासहित सर्वाधिक ८४ रन बनाए । कप्तान जस बटलरले ३२ बलमा ८ चौका र ४ छक्कासहित ६८ रनमा आउट भए । पहिलो विकेटका लागि हेल्स र बटलरले ११.२ ओभरमा १ सय ३२ रनको सानदार शतकीय साझेदारी गर्दै विशाल योगफलको आधार तय गरेका थिए । तर त्यस पछिका ब्याटरले भने राम्रो प्रदर्शन गर्न सकेनन् ।

तीव्र गतिका बलर नाथन एलिसको बलमा बटलर केन रिचर्ड्सनबाट क्याच भएका थिए । रिचर्ड्सनले टिम डेविडबाट क्याच गराएपछि हेल्स टि२० आई करिअरको दोस्रो शतक हान्न १६ रनले चुकेका थिए ।

बेन स्टोक्स ९, ह्यारी ब्रुक १२, मोईन अली १० र साम करन २ रनमा आउट भए । क्रिस वोक्स ५ बलमा १ चौका र १ छक्कासहित १३ र डेविड मलान २ रनमा अविजित रहे ।

सुरुवाती १० ओभरमा १ सय १८ रन बनाएको इंग्ल्यान्डले अन्तिम १० ओभरमा ६ विकेट गुमाउँदै ९० रन मात्रै जोड्यो । अष्ट्रेलियाका नाथन एलिसले ४ ओभरमा २० रन खर्चेर ३ विकेट लिए । केन रिचर्ड्सन, ड्यानिल साम्स र मार्कस स्टोइनिसले एक एक विकेट लिए ।