एजेन्सी – ओपनर ब्रेन्डन किंगको उत्कृष्ट ब्याटिङमा जमैका तलवाजले क्यारेवियन प्रिमियर लिग (सिपिएल) २०२२ को फाइनलमा बार्बाडोस रोयल्सलाई ८ विकेटले हराउँदै उपाधि जितेको छ । जितको लागि १ सय ६२ रनको विजयी लक्ष्य जमैकाले १६.१ ओभरमा २ विकेट गुमाउँदै पूरा गर्यो । जमैकाका ओपनर ब्रेन्डन किंगले ५० बलमा १३ चौका र २ छक्कासहित ८३ रनको अविजित इनिङ खेले ।
शम्राह ब्रुक्स ३३ बलमा ६ चौका र २ छक्कासहित ४७ र कप्तान रोभम्यान पावेलले १४ रन बनाए । बार्बाडोसका काइल मेयर्स र जेसन होल्डरले एक एक विकेट लिए ।
त्यसअघि टस जितेर पहिला ब्याटिङ रोजेको बार्बाडोसले निर्धारित २० ओभरमा ७ विकेट गुमाउँदै १ सय ६१ रन बनायो । बार्बाडोसका आजम खानले ४० बलमा ४ चौका र ३ छक्कासहित सर्वाधिक ५१ रनको योगदान दिए । ओपनर रहकीम कर्नवालले २१ बलमा २ चौका र ४ छक्कासहित ३६ रनमा आउट भए ।
कप्तान काइल मेयर्स १९ बलमा ६ चौकासहित २९ रनमा आउट भए । सुरुवाती ६ ओभरमा ६३ रन जोड्दै उत्कृष्ट सुरुवात दिलाएपनि मध्यक्रमका ब्याटरले निरन्तरता दिन सकेनन् ।
जमैकाका फबिएन एलेन ४ ओभरमा २४ रन खर्चेर ३ विकेट लिए । निकोलसन गोर्डनले ४ ओभरमा ३३ रन खर्चेर ३ विकेट लिए ।