एजेन्सी – युवा ओपनर क्यामरन ग्रीन र टिम डेविडको विष्फोटक ब्याटिङमा अष्ट्रेलियाले तेस्रो तथा निर्णायक टि२० आई खेलमा भारतलाई १ सय ८७ रनको बलियो लक्ष्य दिएको छ । हैदराबादमा टस हारेर पहिला ब्याटिङ थालेको अष्ट्रेलियाले निर्धारित २० ओभरमा ७ विकेट गुमाउँदै १ सय ८६ रन बनायो ।

अष्ट्रेलियाका क्यामरन ग्रीनले २१ बलमा ७ चौका र ३ छक्कासहित ५२ रनको विष्फोटक इनिङ खेले । उनको यो टि२० आई करिअरको दोस्रो अर्धशतक हो । पहिलो खेलमा ग्रीनले भारतविरुद्ध ६१ रनको इनिङ खेलेका थिए ।

त्यस्तै टिम डेविडले २७ बलमा २ चौका र ४ छक्कासहित ५४ रनको आक्रामक इनिङ खेले । डेविडले २५ बलमा आफ्नो अष्ट्रेलियाका लागि पहिलो अन्तर्राष्ट्रिय अर्धशतक हाने । उनले अन्तिम ओभरको पहिलो बलमा हर्षल पटेललाई छक्का हान्दै अर्धशतक पूरा गरेका थिए ।

ग्रीनले १९ बलमा आफ्नो ५० रन पूरा गरेका थिए । ग्रीन भारतविरुद्ध टि२० आईमा सर्वाधिक छिटो अर्धशतक हान्ने खेलाडी हुन् । सातौं विकेटका लागि टिम डेविड र ड्यानियल साम्सले ३४ बलमा ६८ रनको सानदार साझेदारी गर्दै पूनरागमन गराएका थिए । साम्स २० बलमा १ चौका र २ छक्कासहित २८ रनमा अविजित रहे ।

अष्ट्रेलियालाई युवा अलराउन्डर क्यामरन ग्रीनले सानदार सुरुवात दिलाएका थिए । तर त्यो सुरुवातलाई निरन्तरता दिन सकेन । तेस्रो ओभरमै भुनवेश्वर कुमारलाई ग्रीनले दुई छक्का र एक चौकासहित कुल १७ रन जोडेका थिए । चौथो ओभरको अन्तिम तीन बलमा अक्षर पटेललाई लगातार तीन चौका हानेका थिए ।

तर कप्तान आरोन फिन्च पटेलको चौथो ओभरको तेस्रो बलमा मिडअनमा हार्दिक पान्ड्याबाट ७ रनमा क्याच आउट भए । ग्रीनले पाँचौं ओभरको तेस्रो बलमा १९ बलमा आफ्नो ५० रन पूरा गरेका थिए । ग्रीन भारतविरुद्ध टि२० आईमा सर्वाधिक छिटो अर्धशतक हान्ने खेलाडी हुन् ।

यसअघि भारतविरुद्ध टि२० आईमा सर्वाधिक छिटो अर्धशतक वेस्टइन्डिजका जोनसन चाल्र्सले २०१६ मा २० बलमा हानेका थिए । पाँचौं ओभरको अन्तिम बलमा ग्रीन क्याच आउट भए । त्यो समय अष्ट्रेलिया ५ ओभरमा ६२-२ को अवस्थामा थियो ।

त्यसपछि बाँकी ४२ बलमा अष्ट्रेलियाले थप दुई विकेट गुमाउँदै ४१ रन बनाउँदै रनको गति घटाएको थियो । आठौं ओभरको चौथो बलमा ग्लेन म्याक्सवेल ११ बल खेल्दै ६ रनमा रन आउट भए । स्मिथ स्पिनर युजभेन्द्र चहलको बलमा स्टिभ स्मिथ ९ रनमा विकेटकिपर दीनेश कार्तिकबाट स्टम्पिङ आउट भए ।

१४ औं ओभरमा अक्षर पटेलले दुई महत्वपूर्ण विकेट लिँदै अष्ट्रेलियालाई समस्यामा पुर्याए । पहिलो बलमै जोश इंग्लिस रोहित शर्माबाट २४ रनमा क्याच भए । उनले २२ बलमा ३ चौका हाने । यसै ओभरको पाँचौं बलमा म्याथ्यु वेड एक रनमा कट एण्ड बोल्ड भएपछि अष्ट्रेलिया ११७–६ को अवस्थामा पुगेको थियो ।

त्यसपछि साम्स र डेविडले उत्कृष्ट पूनरागमन गराए । भारतका अक्षर पटेलले ४ ओभरमा ३३ रन खर्चेर ३ विकेट लिए । भुवनेश्वर कुमार, हर्षल पटेल र युजभेन्द्र चहलले एक एक विकेट लिए । पहिलो खेलमा अष्ट्रेलिया ४ विकेट र दोस्रो खेलमा भारत ६ विकेटले विजयी भएका थिए । यो खेल जित्ने टोलीले सिरिज पनि जित्ने छन् ।