एजेन्सी – अष्ट्रेलियाका पूर्व अलराउन्डर शेन वाटसनले भारतमा जारी रोड सेफ्टी विश्व सिरिजमा वेस्टइन्डिज लेजेन्ड्सविरुद्ध विष्फोटक ब्याटिङ गर्दै ८ विकेटको सहज जित दिलाएका छन् ।

जितको लागि १ सय ७९ रनको विजयी लक्ष्य पछ्याएको अष्ट्रेलिया लेजेन्ड्सले १५.१ ओभरमा २ विकेट गुमाउँदै पूरा गर्यो । अष्ट्रेलियाको जितमा कप्तान शेन वाटसनले ५० बलमा ५ चौका र ९ छक्कासहित सर्वाधिक ८८ रनको विष्फोटक इनिङ खेले ।

एलेक्स डोलान्ड ३० बलमा २ चौका र ६ छक्कासहित ५६ रनमा आउट भए । बेन डुंक ९ बलमा १ चौका र २ छक्कासहित २१ र कोलुम फर्गुसन ११ रनमा अविजित रहे । डेभ मोहम्मद र ड्वेन स्मिथले एक एक विकेट लिए ।

त्यसअघि देहरादुनमा टस जितेर पहिला ब्याटिङ थालेको वेस्टइन्डिज लेजेन्ड्सले निर्धारित २० ओभरमा ६ विकेट गुमाउँदै १ सय ७८ रन बनायो ।

वेस्टइन्डिजका ओपनर ड्वेन स्मिथले ३३ बलमा ६ चौका र ४ छक्कासहित सर्वाधिक ६५ रनमा आउट भए । कप्तान क्रिक एडवार्ड्स ३३ बलमा ३ चौका र २ छक्कासहित ४६ रनमा आउट भए ।

ब्राइस म्याकगेनले ४ ओभरमा २३ रन खर्चेर ३ विकेट लिए । डर्क नान्सले ४ ओभरमा ३२ रन खर्चेर २ विकेट लिए ।प्रतियोगितामा श्रीलंका, भारत, वेस्टइन्डिज, अष्ट्रेलिया, न्युजिल्यान्ड, दक्षिण अफ्रिका, इंग्ल्यान्ड र बंगलादेशको लेजेन्ड्स टोलीको सहभागिता छ ।

श्रीलंका ४ खेलमा १४ अंकका साथ शीर्ष स्थानमा छ । भारत ४ खेलमा २ मा जितसहित १२ अंकका साथ दोस्रो स्थानमा छ । बंगलादेश जित विहीन हुँदै पुछारमा छ ।