काठमाडौं (हाम्रो खेलकुद) – नेपाल पुलिस क्लबले नवौं राष्ट्रिय खेलकुद अन्तर्गत क्रिकेट प्रतियोगिता दोस्रो सेमिफाइनल खेलमा एनआरएनए स्पोर्ट्स एकेडेमीलाई १३ रनले हराउँदै फाइनलमा स्थान बनाएको छ ।

जितको लागि १ सय ११ रनको विशाल विजयी लक्ष्य पछ्याएको एनआरएनए स्पोर्ट्स एकेडेमीले निर्धारित ८ ओभरमा ३ विकेट गुमाउँदै ९७ रन बनायो । एनआरएनएका लागि कप्तान सुनाम गौतमले २५ बलमा २ चौका र ४ छक्कासहित सर्वाधिक ४६ रन बनाए । सागर पुन २० बलमा ४ छक्कासहित ३७ रनमा आउट भए ।

दोस्रो विकेटका लागि सागर र सुनामले ८३ रनको साझेदारी गरेका थिए । जितको लागि अन्तिम १२ बलमा एनरआएनएलाई ४३ रन चाहिँएको थियो । सातौं ओभरको दोस्रो र तेस्रो बलमा आरिफ शेखलाई सागर पुनले लगातार दुई छक्का हाने । त्यसपछि भने बाउन्ड्री हान्न सकेनन् ।

अन्तिम ६ बलमा २६ रन चाहिँएको थियो । योगेन्द्रसिंह कार्कीले १२ रन खर्चेर दुई विकेट लिँदै फाइनलमा स्थान पक्का गराए । दीनेश खरेल ४ रनमा आउट हुँदा पृथु बाँस्कोटा १ रनमा अविजित रहे । पवन सरार्फले एक विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ थालेको पुलिसले निर्धारित ८ ओभरमा ६ विकेट गुमाउँदै १ सय १० रन बनाएको थियो । पुलिसका आरिफ शेखले १५ बलमा ३ चौका र ३ छक्कासहित सर्वाधिक ३६ रनको योगदान दिए ।

तीव्र गतिका बलर दीपक क्षेत्रीको पहिलो ओभरको पाँचौं बलमा ओपनर कुशल भुर्तेल कभरमा दिवास गिरीबाट १२ रनमा क्याच आउट भए । त्यसअघि कुशलले दुई छक्का हानेका थिए । दोस्रो ओभरको पहिलो बलमा ओपनर सुनिल धमलाले गिरीलाई उत्कृष्ट छक्का हाने । तर दोस्रो बलमा चोभारतर्फको लङअनमा ६ रनमा क्याच आउट भए ।

कप्तान सुनाम गौतमको बलमा दीपेन्द्र काउकर्नरमा २५ रनमा क्याच आउट भए । दीपेन्द्रले १२ बलमा २ चौका र १ छक्का हाने । करण केसी ७ बलमा २ छक्कासहित १८ रनमा आउट भए । गुलशन झा ७ रनमा अविजित रहे । गुलशन झा ७ रन र राशिद खानले ३ रन बनाए ।

एनआरएनएका दिवास गिरीले २ ओभरमा २८ रन खर्चेर २ विकेट लिए । दीनेश खरेलले १ ओभरमा १५ रन खर्चेर १ विकेट लिए । दीपक क्षेत्री र सुनाम गौतमले एक एक विकेट लिए ।

तेस्रो स्थानका लागि शुक्रबार सुदूरपश्चिम प्रदेश र एनआरएनबीच प्रतिस्पर्धा हुनेछ । उपाधिका लागि शुक्रबारनै त्रिभुवन आर्मी क्लब र पुलिसबीच प्रतिस्पर्धा हुनेछ ।

पहिलो सेमिफाइनल भने खेल्न योग्य मैदान नभएपछि आर्मी र सुदूरपश्चिमबीचको खेल रद्द भएको थियो । आर्मी समूह ए को विजेताको रुपमा फाइनलमा पुगेको थियो । समूह चरणमा भने आर्मीले पुलिसलाई १३ रनले हराएको थियो ।