काठमाडौं (हाम्रो खेलकुद) – कप्तान अमृत गुरुङको उत्कृष्ट बलिङको बाबजुद कर्णाली प्रदेशले नवौं राष्ट्रिय खेलकुद अन्तर्गत क्रिकेट प्रतियोगितामा गण्डकी प्रदेशलाई ९४ रनको बलियो लक्ष्य दिएको छ ।

टियु क्रिकेट मैदानमा टस जितेर पहिला ब्याटिङ थालेको कर्णालीले निर्धारित १३ ओभरमा ७ विकेट गुमाउँदै ९३ रन बनायो । कर्णालीका प्रकाश जैशीले १५ बलमा १ चौका र १ छक्कासहित सर्वाधिक १९ रनमा क्याच आउट भए । बायाँ हाते ओपनर विपिन रावलले ७ बलमा २ चौकासहित १३ रन बनाए । सुवास ऐरले २० बलमा १ चौकासहित १३ रन जोडे ।

कर्णालीले सुरुवात राम्रो गरेको थियो । अमृतको दोस्रो ओभरको पाँचौ बलमा विपिन एज लागेर अनिल गुरुङबाट क्याच आउट भए । चौथो ओभरको पाँचौं बलमा कप्तान रविन्द्रजंग शाहीलाई स्पिनर अमृतले नै ९ रनमा कटएण्ड बोल्ड गरे । रविन्द्रले ७ बलमाा १ चौका हाने ।

स्पिनर विपिन खत्रीले अर्जुन घर्तीलाई १ रनमा बोल्ड आउट गरे । विपिनको गतिको बल अर्जुनले चाल पाउन सकेनन् । अमृतले आठौं ओभरको पहिलो बलमा ऐरलाई बोल्ड गरे । तीन बलपछि चोभार एण्डतर्फ छक्का हान्ने धुनमा लङअनमा विपिन शाही ७ रनमा विपिन खत्रीबाट क्याच आउट भए ।

तल्लोक्रमका दीनेश अधिकारीले ३ बलमा २ छक्कासहित १२ रन जोडे । सुमित अधिकारीले १६ बलमा १२ रन जोडे । गण्डकीका अमृत गुरुङले ३ ओभरमा ११ रन खर्चेर ४ विकेट लिए । स्पिनर विपिन खत्रीले ३ ओभरमा १ मेडनसहित ६ रन खर्चेर १ विकेट लिए । १२ औं ओभरमा सुवास भण्डारीले दुई छक्का र एक चौकासहित कुल १९ रन खर्चिएका थिए । सुवास भण्डारीले ३ ओभरमा ३० रन खर्चेर १ विकेट लिए ।

कर्णालीलाई समूह ए बाट शीर्ष दुईमा रहँदै सेमिफाइनल खेल्न यस खेलमा फराकिलो जित हात पार्नुपर्छ । गण्डकी भने बाहिरी सकेको छ । यसअघिका चार खेल वर्षाको कारण अंक बाँडेको थियो । गण्डकी र कर्णाली दुबैको यो अन्तिम खेल हो । समूह चरणको अन्तिम खेलमा आज आर्मी र पुलिसबीच प्रतिस्पर्धा हुनेछ ।