काठमाडौं (हाम्रो खेलकुद) – वर्षाले प्रभावित बनेको नवौं खेलकुद अन्तर्गत ३४ औं क्रिकेट प्रतियोगिताले हालकै खेल तालिका अनुसार निरन्तरता पाउने भएको छ ।

मंगलबार साँझ राष्ट्रिय खेलकुद परिषद् (राखेप) मा सहभागी टोलीका प्रशिक्षक, कप्तान र म्यानेजरबीचको वर्षाले प्रभावित प्रतियोगिताबारे छलफल गर्न बैठक बसेको थियो । बैठकमा त्रिभुवन आर्मी क्लबले फरक मत राखेपछि समूह बी बाट बागमती प्रदेश र नेपाल एपिएफ क्लब एक खेल पनि खेल्न नपाइ बाहिरिने भएका छन् ।

बैठकमा एनआरएनए नेपाल बाहेक अन्य सबै १० टोलीका प्रतिनिधिको उपस्थिति थियो । राखेप सदस्य सचिव टंकलाल घिसिङ बैठकमा उपस्थीति भने थिएनन् ।

आर्मी बाहेकका ९ टोलीले प्रतियोगिता मिति समायोजन गर्न सहमती देखाएको बुझिएको छ । तर आर्मीले भने आइसिसी र क्यानको नियम अनुसारनै प्रतियोगितालाई निरन्तरता दिन माग राखेको छ । यो सँगै प्रतियोगिता अहिलेकै तालिका अनुसार अघि बढ्ने भएको छ ।

‘आज बैठक भएको थियो । हाम्रो तर्फबाट कप्तान र म्यानेजर पठाएका थियौं । हामीले लगभग सबै खेल नभएको अवस्था र तीन टोलीले मैदान नै पस्न नपाइ बाहिरिनु परेको अवस्थामा यो प्रतियोगिता अर्थपूर्ण भएन, पुनर्विचार गरेर फेरि गरौं भन्ने कुरा भएको थियो’, बागमती प्रदेशका अध्यक्ष राजु बस्नेतले हाम्रो खेलकुदसँग भने ।

‘राखेप सदस्य सचिवले ११ वटै टोलीले मानेको खण्डमा हुन्छ भन्नु भएको थियो । एनआरएनएको प्रतिनिधि बैठकमा थिएनन् । १० वटा टोली मध्य ९ टोलीले मानेका थिए । तर नेपाल आर्मीले हामी मान्दैनौं भनेपछि जसरी प्रतियोगिता चलेको छ । त्यसरी नै लैजाने निर्णय भयो रे’, बस्नेतले हाम्रो खेलकुदसँग भने ।

‘हामी ९ वटा जिल्ला र क्लबले नेपाल सरकारको ठूलो खर्च भएको छ । खेलाडीले यस प्रतियोगिताको लागि धेरै मिहिनेत गरेका छन् । उनीहरुले खेल देखाउने ठाउँ पनि थियो । यसले गर्दा धेरै ठूलो घाटा लागेको छ । नेपाल सरकारको लगानी पनि पानीले बगाएको छ ।

यसरी हुँदैन, यसलाई व्यवस्थित तरिकाले लगेर जाउँ । नेपाल टि२० लिगले हुँदैन भने बरु त्यो भन्दा पछाडी गरौं । अलिकति भएपनि क्रिकेट खेलाडी क्रिकेटको विकास हुन्छ । सरकारको लगानी सहि ठाउँमा जान्छ भनेका थियौं । तर नेपाल आर्मीले नमानेको हुँदा अघि बढ्ने भयो,’ बस्नेतले भने ।

यता त्रिभुवन आर्मीको तर्फबाट कप्तान विनोद भण्डारी, प्रशिक्षक चन्द्र साउद र सेनानी हरिस चन्द बैठकमा गएका थिए । सेनानी हरिस चन्दले आइसिसीको नियम अनुसार नै अघि बढ्न माग गरेको बताए ।

‘हामीलाई प्रतियोगिता सार्न हुन्छ वा हुँदैन भनिएको थियो । हामीले हुँदैनौ भन्यौं । हामीले क्यान र आइसिसीको नियम अनुसार गर्न ठिक हुन्छ । भनेका थियौं । आर्मीले मान्यो वा मानेन भन्दापनि क्यानको नियम सबैले मान्नुपर्छ’, सेनानी चन्दले भने ।

‘आइसिसीको नियम मानौं भोली पर्सी अरुलाई पनि समस्या पर्छ । त्यही नियम अनुसार गएपछि सहज हुन्छ । हामी नियम अनुसार निरन्तरता दिन भन्यौं । बैठकमा आज सदस्य सचिव हुनुहुन्थ्यो । आइसिसीको नियम मान्ने भन्दै सबैले हस्ताक्षर गरेर बाहिरिएका थियौं’, सेनानी चन्दले भने ।

समूह ए मा मधेश प्रदेश, कर्णाली, त्रिभुवन आर्मी क्लब, नेपाल पुलिस क्लब, गण्डकी प्रदेश र लुम्बिनी प्रदेश छन् । समूह बी मा एनआरएनए नेपाल, बागमती प्रदेश, सुदूरपश्चिम प्रदेश, प्रदेश १ र नेपाल एपिएफ क्लब छन् ।

सेमिफाइनलको दाबेदार मानिएको बागमती प्रदेशले समूह बी मा चार खेलमा एक खेल पनि नखेली समूह चरणबाटै बाहिरिनु पर्यो । बागमतीको पहिलो खेल भदौ २३ मा बागमती र प्रदेश १ बीच टियु मैदानमा थियो । बागमतीका कप्तान ज्ञानेन्द्र मल्ल टसका लागि मैदान छिरेपनि वर्षाको कारण फर्कनु परेको थियो । दोस्रो खेलमा बागमती र सुदूरपश्चिमबीचको खेल टियु मैदानमा वर्षाको कारण हुन सकेन ।

आइतबार मुलपानीमा बागमतीले एनआरएनए नेपालसँग अंक बाँड्यो । अन्तिम खेलमा सोमबार बागमतीले एपिएफसँग पनि अंक बाँडेपछि बाहिरिनु परेको हो । समूह बी को अन्तिम खेलमा मुलपानीम सुदूरपश्चिम र एपिएफले वर्षाको अंक बाँडेका छन् । योसँगै एपिएफ पहिलो चरणबाटै बाहिरिएको छ ।

समूह बी मा एनआरएनए नेपाल ४ खेलमा १ मा जित र ३ खेलमा अंक बाँड्दै ५ अंक जोडेर शीर्ष स्थानमा रहँदै सेमिफाइनलमा स्थान बनायो । समूह बी बाट एनआरएन नेपाल सेमिफाइनलमा पुग्ने पहिलो टोली हो । एनआरएनएले सुदूरपश्चिम प्रदेशलाई १२ रनले हराउँदा अन्य सबै टोलीसँग अंक बाड्यो ।

दोस्रो खेलमा एनआरएनले एपिएफसँग १३.३ ओभरमा टियुमा २ विकेट गुमाउँदै १ सय २० रन बनाएको अवस्थामा खेल स्थगित भएको थियो । टस भएर पनि खेल हुन नसकेको यो मात्र एक खेल हो । सुदूरपश्चिम ४ खेलमा १ मा जित, १ मा हार र २ खेलमा अंक बाँड्दै दोस्रो स्थानमा रहेर सेमिफाइनलमा स्थान बनायो । तीन टोली बागमती, सुदूरपश्चिम र एपिएफको समान ४ अंक भएपनि सर्वाधिक जितको कारण सुदूरपश्चिमले सेमिफाइनलमा स्थान बनाएको हो ।

बागमती ४ खेलमा अंक बाड्दै ४ अंकका साथ तेस्रो स्थानमा रह्यो । एपिएफ ४ खेलमा चारनै अंक बाँडेर चौथो स्थानमा रह्यो । समूह बी का कुल १० खेल हुनुपर्ने भएपनि दुई खेलको मात्र नतिजा आयो । अन्य ८ खेलमा अंक बाड्नु पर्यो । पहिलो खेलमा एनआरएनएले सुदूरपश्चिमलाई ६–६ ओभरको खेलमा १२ रनले हराएको थियो । दोस्रो खेलमा सुदूरपश्चिम प्रदेशले प्रदेश एकलाई १३ रनले हराएको थियो । अन्य कुनैपनि खेल हुन सकेको छैन ।

यता समूह ए मा नेपाल पुलिस क्लब ४ खेलमा २ मा जित र २ अंक बाँड्दै ६ अंकका साथ शीर्षस्थानमा छ । पुलिसले टियु मैदानमा कर्णालीलाई ९ विकेट र लुम्बिनी प्रदेशलाई ७६ रनले हराएको थियो । मुलपानीमा मधेश प्रदेश र गण्डकीसँग अंक बाड्यो । आज नै पहिलो खेलमा मुलपानीमा गण्डकी र पुलिसले अंक बाँडेका थिए ।

आर्मी ४ खेलमा २ मा जित र २ खेलमा अंक बाँड्दै ६ अंक जोडेर दोस्रो स्थानमा छ । आर्मीले कर्णाली र गण्डकीसँग अंक बाँडेको थियो । आर्मीले मधेश प्रदेशलाई ६ विकेटले हराएको थियो । आर्मीले लुम्बिनीलाई ९ विकेटले हराएको थियो । आर्मीले अन्तिम खेलमा बुधबार टियु मैदानमा खेल्नेछ ।

कर्णाली प्रदेश ४ खेलमा १ मा जित, १ मा हार र २ खेलमा अंक बाड्दै ४ अंकका साथ तेस्रो स्थानमा छ । कर्णालीले मधेश प्रदेशलाई तीन रनले हराएको थियो । पुलिससँग ९ विकेटले हारेको थियो । आर्मी र लुम्बिनीसँग भने वर्षाको कारण अंक बाड्नु परेको थियो । कर्णालीले बुधबार पहिलो खेलमा टियुमा गण्डकीसँग खेल्नेछ । कर्णालीले विशाल जित निकाल्दा र आर्मी पुलिससँग पराजित हुँदा भने आर्मी बाहिरिने सम्भावना रहन्छ ।

गण्डकी सबै ४ खेलमा अंक बाँड्दै चौथो स्थानमा छ । लुम्बिनी ५ खेलमा ५ मा हार र तीनमा अंक बाँड्दै ३ अंक जोडेर पुछारमा रहेर बाहिरियो । मधेश प्रदेश ५ खेलमा २ मा हार र तीन खेलमा अंक बाँड्दै पाँचौं स्थानमा रहेर बाहिरियो ।

बुधबार टियु मैदानमा पहिलो खेलमा कर्णाली र गण्डकी तथा दोस्रो खेलमा नेपाल पुलिस र आर्मीबीच प्रतिस्पर्धा हुनेछ । सेमिफाइनल भदौ ३० र फाइनल भदौ ३१ मा हुनेछ ।