एजेन्सी – उपाधिको दाबेदार भारतले आगमी अक्टोबर नोभेम्बरमा अष्ट्रेलियामा हुने टि२० विश्वकपको आफ्नो १५ सदस्य टोली घोषणा गरेको छ । रोहित शर्माको कप्तानीमा घोषणा टोलीमा तीव्र गतिका बलर जस्प्रित बुमराह र हर्षल पटेलले पूनरागमन गरेका छन् ।

तीव्र गतिका बलर जस्प्रित बुमराह र हर्षल चोटपछि फर्किएका हुन् । टि२० एसिया कपमा यी दुई बलर नहुँदा भारत सुपर फोरबाटै बाहिरिएको थियो ।

गतवर्ष भने भारत पाकिस्तानसँग १० विकेट र न्युजिल्यान्डसँग ८ विकेटले पराजित हुँदै सुपर १२ बाटै बाहिरिएको थियो । भारत यसपटक भने उपाधि जित्ने लक्ष्यमा छ । तर एसिया कपमा यसै साता सुपर फोरबाट बाहिरिएको हुँदा अतिरिक्त दबाबमा छ ।

सुपर फोरमा पाकिस्तानसँग ५ विकेट र श्रीलंकासँग ६ विकेटले पराजित भएको थियो । भारत एसिया कपको गल्ती सुधार गर्दै विश्वकप जित्न चाहन्छ । बुमराह र हर्षलको पूनरागमनले मनोबल अझ उच्च हुनेछ ।

भारतले दुबै विकेटकिपर दीनेश कात्तिक र ऋषभ पन्तलाई मौका दिएको छ । यी दुई मध्य प्लेइङ ११ मा एक मात्र खेल्ने देखिन्छ ।

भारतमा खेलाडीबीच उच्च प्रतिस्पर्धा छ । जसले गर्दा थुप्रै स्टार खेलाडीले मौका पाउन सकेका छैनन् । टि२० विश्वकपमा नभएका भारतका पाँच स्टार खेलाडी यस प्रकार छन् ।

५. श्रेयस ऐर

मध्यक्रमका ब्याटर श्रेयस ऐरले विश्वकप टोलीमा स्थान बनाउन सकेनन् । ऐरलाई भारतले वैकल्पिक खेलाडीको सूचिमा राखेको छ । २७ वर्षीय ऐरले भारत र आइपिएलमा मध्यक्रमका राम्रो प्रदर्शन गर्दै आएका छन् । दिल्लीको तीन वर्ष कप्तानी गरेका श्रेयस ऐर गत सिजनदेखि कोलकाता नाइट राइडर्सको टोलीको नेतृत्व गरेका छन् ।

मध्यक्रममा भारतका विराट कोहली, सूर्यकुमार यादव र ऋषभ पन्त भएपछि श्रेयरले मौका नपाएका हुन् । ऐरले चौथो र पाँचौं नम्बरमा ब्याटिङ गर्ने गर्दछन् । तर त्यस नम्बरमा सूर्यकुमार यादव, पन्त र हार्दिक पान्ड्या हुँदा श्रेयसले मौका पाउन सकेनन् ।

श्रेयस सूर्य अघि भारतले चौथो नम्बरमा खेलाएको थियो । उनले ४६ टि२० आई खेलमा ७ अर्धशतकसहित कुल १ हजार २९ रन बनाएका छन् । उनको स्ट्राइकरेट १३६.६५ छ । तर त्यो भूमिका सूर्यले अझ सानदार प्रदर्शन गरेपछि मौका पाउन सकेनन् ।

४.सञ्जु स्यामसन

विकेटकिपर सञ्जु स्यामसन भारतमा अवसर नपाएका खेलाडी हुन् । आइपिएलमा लगातार सानदार प्रदर्शन गर्दै आएका स्यामसनले भारतीय टोलीमा मौका पाउन सकेनन् । विकेटकिपरमा पन्त र कार्तिकलाई राखेको छ ।

तेस्रो विकल्पमा लोेकेश राहुल पनि हुनेछन् । सञ्जु ओपनिङ देखि तल्लोक्रमसम्म राम्रो ब्याटिङ गर्ने गर्दछन् । सञ्जुले १६ टि२० आई खेलमा एक अर्धशतकसहित कुल २ सय २९ रन बनाएका छन् । भूमिका खाली नभएपछि स्यामसनले मौका नपाएका हुन् ।

३.मोहम्मद शामी

तीव्र गतिका बलर मोहम्मद शामीलाई भारतले मौका दिन सकेन । भारतले तीव्र गतिका बलर जस्प्रित बुमराह, भुवनेश्वर कुमार, हर्षल पटेल र अर्शदीप सिंहलाई तीव्र गतिको बलरको रुपमा समेटेको छ । पार्टटाइममा हार्दिक पान्ड्या हुनेछन् ।

अर्शदीप सिंहले एसिया कपमा डेथ ओभरमा उत्कृष्ट प्रदर्शन गरेपछि शामीको स्थान कठिन बनेको थियो । भारतले शामीलाई वैकिल्पक खेलाडीको सूचिमा राखेको छ । अर्कोतर्फ शामीले भारतबाट टि२० आई गतवर्ष टि२० विश्वकपमा नामिबियाविरुद्धपछि खेलेका छैनन् ।

गतवर्ष गुजरात टाइटन्सलाई च्याम्पियन बनाउन शामीले आइपिएलमा उत्कृष्ट प्रदर्शन गर्दै २० विकेट लिएका थिए । आइपिएलमा नयाँ बलका साथ पावर प्लेमा उत्कृष्ट प्रदर्शन गरेपछि उनको सम्भावना झनै बढेको थियो । तर भारतले उनलाई पछिल्लो समय मौका नै दिएको छैन ।

२ रविन्द्र जडेजा

भारतका प्रमुख स्पिन अलराउन्डर रविन्द्र जडेजा भने चोटका कारण टोलीमा पर्न नसेका हुन् । जडेजाले एसिया कपको समयमा घाइते हुँदा घुँडाको शल्यक्रिया गराएका थिए । जसको कारण जडेजाले भारतीय टोलीमा स्थान बनाउन सकेनन् ।

उनी नहुँदा भारतको स्पिन आक्रामणमा केहि असर समेत पर्नेछ । जडेजा तल्लोक्रममा राम्रो ब्याटिङ, उत्कृष्ट फिल्डर र स्पिनर हुन् । जडेजा घाइते भएपछि भारतले दीपक हुडालाई विश्वकप टोलीमा मौका दिएको छ ।

१. ईशान किशन

बायाँ हाते विकेटकिपर ईशान किशनले पनि भारतको टोलीमा स्थान बनाउन सकेकनन् । ओडिआई र टि२० आई दुबैमा डेब्यूमै अर्धशतक हान्ने पहिलोे भारतीय खेलाडी समेत रहेका ईशानले भारतको टोलीमा मौका पाएनन् । किशन गतवर्ष भने विश्वकप टोलीमा थिए ।

ओपनरमा रोहित र राहुल छन् । विराट कोहलीले यसै साता ओपनिङ गर्दै एसिया कपमा अफगानिस्तानविरुद्ध १ सय २२ रनको शतकीय इनिङ खेलेका थिए । कोहली पनि ओपनरका विकल्प हुन् । भारतले सूर्य कुमार यादवलाई पनि ओपनरमा प्रयोग गर्न सक्छ । चार ओपनरको विकल्प भएपछि किशनले मौका नपाएका हुन् ।

ईशानले भारतबाट १९ टि२० आई खेलमा ४ मा अर्धशतकसहित कुल ५ सय ४३ रन बनाएका छन् । उनको स्ट्राइकरेट १३१.१५ छ । विकेटकिपरमा कार्तिक, पन्त र राहुल छन् । त्यसैले स्थान बनाउन सकेनन् । बायाँ हाते ओपनर हुँदा मौका पाउन सक्ने अनुमान गरिएको थियो ।

भारतको विश्वकप खेल्ने टोली :

रोहित शर्मा (कप्तान), लोकेश राहुल(उपकप्तान), विराट कोहली, सूर्यकुमार यादव, दीपक हुडा, ऋषभ पन्त, दीनेश कार्तिक (विकेटकिपर), हार्दिक पान्ड्या, रविचन्द्रन आश्विन, युजभेन्द्र चहल, अक्षर पटेल, जस्प्रित बुमराह, भुवनेश्वर कुमार, हर्षल पटेल र अर्शदीप सिंह ।

वैकल्पिक : मोहम्मद शामी, श्रेयस ऐर, रवि विश्रोई र दीपक चाहर ।

पहिलो चरणको समूह ए – श्रीलंका, नामिबिया र युएई, नेदरल्यान्ड्स

समूह बी – वेस्टइन्डिज, स्कटल्यान्ड, आयरल्यान्ड र जिम्बावे

सुपर १२ को समूह १ – इंग्ल्यान्ड, न्युजिल्यान्ड, अष्ट्रेलिया, अफगानिस्तानसँगै पहिलो चरणको समूह ए को विजेता र समूह बी को उपविजेता

सुपर १२ को समूह २ – भारत, पाकिस्तान, दक्षिण अफ्रिका, बंगलादेशसँगै पहिलो चरणको समूह बी को विजेता र समूह ए को उपविजेता

उपाधि दाबेदार भारतको टि२० विश्वकप खेल्ने टोली घोषणा