एजेन्सी – भारतीय लेजेन्ड्सले रोड सेफ्टी वल्र्ड सिरिजमा दक्षिण अफ्रिका लेजेन्ड्समाथि ६१ रनको सानदार जित हात पारेको छ । जितको लागि २ सय १८ रनको विजयी लक्ष्य पछ्याएको दक्षिण अफ्रिकाले निर्धारित २० ओभरमा ९ विकेट गुमाउँदै १ सय ५६ रन बनायो ।

दक्षिण अफ्रिकाका लागि कप्तान जोन्टी रोड्सले २७ बलमा ५ चौका र १ छक्कासहित सर्वाधिक ३८ रनमा अविजित रहे । एन्ड्रयू पुटिक २३, मोर्ने भान २६ र ज्याकस रुडोफले १६ रन बनाए ।

भारतीय लेजेन्ड्सका राहुल शर्माले ४ ओभरमा १७ रन खर्चेर ३ विकेट लिए । मुनाफ पटेल र प्रज्ञान ओझाले दुई दुई विकेट लिए । इरफान पठानले एक विकेट लिए ।

त्यसअघि कानपुरमा टस जितेर पहिला ब्याटिङ थालेको भारतीय लेजेन्ड्सले निर्धारित २० ओभरमा ४ विकेट गुमाउँदै २ सय १७ रन बनाएको थियो । भारतीय स्टुअर्ट बिन्नीले ४२ बलमा ५ चौका र ६ छक्कासहित सर्वाधिक ८२ रनको अविजित इनिङ खेलेका थिए । युसुफ पठान १५ बलमा १ चौका र ४ छक्कासहित ३५ रनको आक्रामक इनिङ खेले ।

पाँचौं विकेटका लागि पठान र बिन्नीले ८८ रनको अविजित साझेदारी गरे । ओपनर नमन ओझा १८ बलमा ४ चौकासहित २१ रनमा आउट भए । कप्तान सचिन तेन्दुलकर १५ बलमा २ चौकासहित १६ रनमा आउट भए ।

सुरेश रैनाले २२ बलमा ४ चौका र १ छक्कासहित ३३ रनको इनिङ खेले । दक्षिण अफ्रिकाका जोहान भान डेर वाथ ३ ओभरमा २८ रन खर्चेर २ विकेट लिए ।

प्रतियोगितामा भारत, न्युजिल्यान्ड, इंग्ल्यान्ड, बंगलादेश, वेस्टइन्डिज, अष्ट्रेलिया, श्रीलंका र दक्षिण अफ्रिका लेजेन्ड्सको सहभागीता छ ।