काठमाडौं (हाम्रो खेलकुद) – नेपाल टि२० लिगमा ए ग्रेडमा विकेटकिपर विनोद भण्डारीसहित पाँच खेलाडी बिक्न सकेनन् । शनिबार पहिलो राउन्डमा ६ फ्रेन्चाइज टोलीले ए ग्रेडमा ६ मार्की खेलाडी किनेका छन् । मार्की बाहिर पोखराले ए ग्रेडकै शरद भेषावकरलाई किनेको छ । ए ग्रेडका खेलाडीलाई १५ लाखमा अनुबन्ध गरेका हुन् ।

ड्राफ्टमा ए ग्रेडमा कुल १२ खेलाडीले भोरेका थिए । विकेटकिपर विनोद भण्डारी, अलराउन्डर आरिफ शेख, कुशल भुर्तेल, विकेटकिपर सुबास खकुरेल र तीव्र गतिका बलर अभिनाश बोहराले १५ लाखको ग्रेड ए मा नाम दर्ता गराएका थिए । तर उनीहरुलाई कुनैपनि फ्रेन्चाइज टोलीले रुचि देखाएनन् ।

ए ग्रेडमा अनुबन्ध नभएपछि उनीहरु बी ग्रेडमा झरेका छन् । बी ग्रेडका खेलाडीहरुले भने १० लाख पाउनेछन् । यी खेलाडीमा बी मा नबिकेको खण्डमा सी मा भने झर्ने छैनन् । यी पाँच खेलाडीलाई अव १० लाखमै किन्नुपर्ने हुन्छ । बी मा भरेका खेलाडी नबिकेको खण्डमा सी मा झर्न सक्छन् ।

पोखरा एभेन्चर्सले विकेटकिपर आसिफ शेखलाई मार्की खेलाडीको रुपमा अनुबन्ध गरेको छ । १५ लाखमै पोखराले शरद भेषवाकरलाई पनि अनुबन्ध गरेको छ । काठमाण्डु कान्तिपुरले ज्ञानेन्द्र मल्ललाई मार्की खेलाडीको रुपमा अनुबन्ध गरेको छ । अलराउन्डर दीपेन्द्रसिंह ऐरीलाई लुम्बिनी अलस्टार्सले मार्की खेलाडीको रुपमा अनुबन्ध गरेको छ ।

अलराउन्डर करण केसीलाई फार वेस्टन युनाइटेड, रोहित कुमार पौडेललाई विराटनगर किंग्स र तीव्र गतिका बलर सोमपाल कामीलाई जनकपुर रोयल्सले मार्की खेलाडीको रुपमा अनुबन्ध गरेको छ । दोस्रो राउन्डको ड्राफ्ट आइतबार हुनेछ ।

दोस्रो राउन्डमा ९२ खेलाडीबाट अनुबन्ध गर्नुपर्ने हुन्छ । जसमध्य ७ खेलाडी ए ग्रेडमा बिकेका छन् । बी ग्रेडमा २४ र सी ग्रेडमा ३६ खेलाडी अनुबन्ध हुनेछन् । एक फ्रेन्चाइज टोलीले बी बाट ४ र सी बाट ६ खेलाडी अनुबन्ध गर्न पाउँछन् ।

नेपाल टि२० लिग आगमी असोज ८ देखि कार्तिक ५ (सेप्टेम्बर २४ देखि अक्टोबर २२) सम्म आयोजना हुँदैछ । प्रतियोगिता होम तथा अवेका रुपमा गरि डबल राउन्ड रोबिनको आधारमा कीर्तिपुर मैदानमा हुनेछ ।

प्रतियोगितामा ए ग्रेडका खेलाडीले १५ लाख, बी ग्रेडका १० लाख र सी ग्रेडका ५ लाख रुपैयाँ पाउने छन् । एक टोलीमा ११ नेपाली खेलाडी र ५ विदेशी खेलाडी राख्दै टिम निर्माण गर्नुपर्ने हुन्छ ।