काठमाडौं (हाम्रो खेलकुद) – नेपाल टि२० लिगको ड्राफ्टमा काठमाडौं गोर्खाजले मार्की खेलाडीको रुपमा नेपालका पूर्व कप्तान ज्ञानेन्द्र मल्ललाई अनुबन्ध गरेको छ । पहिलो राउन्डमा ६ फ्रेन्चाइज टोलीले ए ग्रेडमा १५ लाखमा मार्की खेलाडी किनेका छन् ।

कान्तिपुर मिडिया ग्रुपको सामित्वमा रहेको काठमाडौं गोर्खाजले ज्ञानेन्द्रलाई ए ग्रेडबाट मार्की खेलाडीमा अनुबन्ध गरेको हो । ज्ञानेन्द्रले १५ लाख पाउनेछन् ।

ज्ञानेन्द्र नेपालका अनुभवी खेलाडी र कप्तान हुन् । ज्ञानेन्द्रले २०१९ देखि २०२१ सम्म नेपाली क्रिकेट टोलीको कप्तानी नै गरेका थिए । ज्ञानेन्द्र बागमती प्रदेशका कप्तान् समेत हुन् । यसअघि एभरेष्ट प्रिमियर लिगमा ललितपुर प्याट्रियटर्स, धनगढी प्रिमियर लिगमा काठमाडौं गोल्डेन्स र पोखरा प्रिमियर लिगमा काठमाडौंकै कप्तानी गर्दै आएका थिए । ज्ञानेन्द्रको कप्तानीमा ललितपुरले २०१८ मा तेस्रो संस्करणको इपिएल जितेको थियो ।

प्रमुख ब्याटर तथा कप्तान ज्ञानेन्द्रलाई किन्न ६ फ्रेन्चाइज नै इच्छुक देखिएका थिए । युवा ओपनर आसिफ शेखलाई पोखरा एभेन्चर्सले मार्की खेलाडीमा किनेको छ । पोखराले शरद भेषवाकरलाई पनि १५ लाखमै ए ग्रेडबाट अनुबन्ध गरेको छ । अलराउन्डर दीपेन्द्रसिंह ऐरीलाई लुम्बिनी अलस्टार्सले मार्की खेलाडीको रुपमा अनुबन्ध गरेको छ ।

अलराउन्डर करण केसीलाई फार वेस्टन युनाइटेड, रोहित कुमार पौडेललाई विराटनगर किंग्स र तीव्र गतिका बलर सोमपाल कामीलाई जनकपुर रोयल्सले मार्की खेलाडीमा अनुबन्ध गरेको छ ।

अभिनाश बोहरा, आरिफ शेख, विनोद भण्डारी, कुशल भुर्तेल र सुबास खकुरेल भने ए मा बिक्न सकेनन् । त्यसैले उनीहरु बी मा झरेका छन् । दोस्रो राउन्डको ड्राफ्ट आइतबार हुनेछ । दोस्रो राउन्डमा ९२ खेलाडी छन् । बी ग्रेडमा २४ र सी ग्रेडमा ३६ खेलाडी किन्नुपर्ने हुन्छ ।

नेपाल टि२० लिग आगमी असोज ८ देखि कार्तिक ५ (सेप्टेम्बर २४ देखि अक्टोबर २२) सम्म आयोजना हुने यसअघि नै सार्वजनिक भएको थियो । प्रतियोगिता होम तथा अवेका रुपमा गरि डबल राउन्ड रोबिनको आधारमा हुनेछ । खेल दिउँसो हुनेछ ।

प्रतियोगितामा ए ग्रेडमा रहेका खेलाडीले १५ लाख, बी ग्रेगमा रहने खेलाडीले १० लाख र सी ग्रेडमा रहने खेलाडीले ५ लाख रुपैयाँ न्यूनतम पाउने छन् । एक टोलीमा ११ नेपाली खेलाडी र ५ विदेशी खेलाडी रहनुपर्छ । ड्राफ्टमा नाम भने १ हजार भन्दा बढीले भोरेका थिए ।