काठमाडौं (हाम्रो खेलकुद) – क्रिकेट खेलाडी संघ नेपाल (सिप्यान) ले शुक्रबार (भदौ २४) मा विभिन्न पाँच विधामा अवार्ड प्रदान गर्दैछ । अवार्ड शुक्रबार साँझ साढे पाँच बजेपछि धुम्बराहीमा रहेको अकामा सुरु हुनेछ ।

सिप्यानले वर्ष क्रिकेट खेलाडी पुरुष र महिला २०२२ प्रदान गर्नेछ । वर्ष क्रिकेट खेलाडीको मनोनयमा अलराउन्डर दीपेन्द्रसिंह ऐरी, तीव्र गतिका बलर करण केसी, उपकप्तान रोहित पौडेल र ओपनर कुशल भुर्तेल छन् । लेगस्पिनर सन्दीप लामिछानेको नाम भने मनोनयनबाट हटाइएको आयोजकले जानकारी दिएको छ । पक्राउ पुर्जी जारी भएसँगै उनको नाम अवार्डको दुई विधाबाट हटाइएको हो ।

दीपेन्द्रले गत पपुवा न्युगिनी र मलेसियासँगको सिरिजमा सानदार प्रदर्शन गरेका थिए । दीपेन्द्रले पपुवा न्युगिनीविरूद्ध ओडिआई र मलेसियाविरुद्ध टि२० आईमा शतक हानेका थिए । करण केसीले पछिल्लो सयम लगातार उच्च प्रदर्शन गर्दै आएका छन् ।

उपकप्तान रोहित पौडेलले पनि पछिल्लो एक वर्षमा सानदार प्रदर्शन गर्दै आएका छन् । पपुवा न्युगिनीविरुद्ध गत मार्चमा कीर्तिपुर मैदानमा रोहितले १ सय २६ रनको शतकीय इनिङ खेलेका थिए । यो कुनैपनि नेपाली खेलाडीले अन्तर्राष्ट्रिय क्रिकेटमा हानेको सर्वाधिक उच्च स्कोर हो ।

त्यस्तै कीर्तिमानी ओपनर कुशल भुर्तेल पनि मनोनयमा परेका छन् । भुर्तेलले गतवर्ष नेदरल्यान्ड्स र मलेसियाविरुद्ध टि२० आई सिरिजमा सानदार प्रदर्शन गरेका थिए । भुर्तेलले डेब्यूको सुरुवाती तीन टि२० आई खेलमा लगातार अर्धशतक हान्दै यस उपलब्धी हात पार्ने विश्वकै पहिलो खेलाडी बनेका थिए । टि२० विश्वकप ग्लोबल छनोट ए मा फिलिपिन्सविरुद्ध कुशलले शतक हानेका थिए ।

त्यस्तै महिलातर्फ वर्ष उत्कृष्ट खेलाडी पनि सार्वजनिक भएको छ । वर्ष महिला उत्कृष्ट खेलाडीमा ज्योति पाण्डे, ईन्दु बर्मा, सिता रानामगर, कविता कुँवर र रुविना क्षेत्री छन् ।

सीता नेपाली महिला अन्तर्राष्ट्रिय क्रिकेटमा एकै खेलमा सर्वाधिक रन बनाउने ब्याटर हुन् । उनले गतवर्ष नोभेम्बरमा कतारविरुद्ध दोस्रो टि२० आई खेलमा ८२ रनको कीर्तिमानी इनिङ खेलेकी थिइन् । त्यस्तै नोभेम्बरमा आइसिसी टि२० विश्वकप एसिया क्षेत्र छनोटमा सानदार प्रदर्शन गर्दै प्रतियोगिताकै सर्वोत्कृष्ट खेलाडी चुनिएकी थिइन् ।

इन्दुले कतारसँगको पहिलो टि२० आई खेलमा ५५ रन बनाएकी थिइन् । उनी नेपाली महिला टोलीबाट टि२० आईमा अर्धशतक हान्ने पहिलो खेलाडी हुन् । कतिवा कुँवरले घरेलु क्रिकेटमा सानदार प्रदर्शन गर्दै आएकी छिन् ।

ज्योति पाण्डेले घरेलु र अन्तर्राष्ट्रिय दुबै क्रिकेटमा उत्कृष्ट प्रदर्शन गर्दै आएकी छिन् । रुविनाले दुई वर्षअघि एपिएफलाई हराउँदै प्रदेश १ लाई पहिलो पटक प्रधानमन्त्री कपको उपाधि दिलाएकी थिइन् । घरेलु क्रिकेटमा रुविनाले राम्रो प्रदर्शन गर्दै आएकी छिन् ।

महिला र पुरुष वर्ष उत्कृष्ट खेलाडीको विजेता खेलाडीले पुरस्कार राशी १ लाख ३२ हजार पाउने छन् । त्यस्तै वर्ष उदीयमान खेलाडी र वर्ष उत्कृष्ट क्षण २०२२ पनि मनोनयन सार्वजनिक गरेको छ । उदीमायन खेलाडीको मनोनयमा देव खनाल, लोकेश बम, हिरान्मई राय, स्पिनर सागर ढकाल र आदिल अन्सारी छन् ।

वर्षको उत्कृष्ट क्षण पनि मनोनयन पनि सार्वजनिक गरेको छ । वर्षको उत्कृष्ट क्षणमा आइसिसी विश्वकप लिग २ मा स्कटल्यान्डलाई उसकै घरेलु मैदानमा नेपालले आफ्नो इतिहासमै पहिलो पटक हराएको थियो । दीपेन्द्रसिंह ऐरीको पपुवा न्युगिनीविरुद्ध ओडिआईमा १ सय ५ र मलेसियाविरुद्ध टि२० आईमा १ सय १० रन रहेको छ । टि२० आईमा १ सय १० रन एक खेलमा ब्यक्तिगत उच्च योगफल हो ।

त्यस्तै अस्मिना कर्माचार्यले टि२० एसिया कप छनोटको सेमिफाइनलमा युएईविरुद्ध ३.५ ओभरमा १० रन खर्चेर ५ विकेट लिएकी थिइन् । तर वर्षाको कारण नेपाल एसिया कप खेल्नबाट बाहिरिएको थियो । त्यस्तै कुशल भुर्तेल डेब्यू गर्दै लगातार तीन खेलमा क्रमश : ६२, ६१ र ६२ रनमा आउट भएका थिए । यस विधाबाट पनि सन्दीप लामिछानेको नाम हटाइएको छ ।

दुवै अवार्डको पुरस्कार राशी समान ६६ हजार कर सहित हुनेछ । विशेष अवार्ड २०२२ प्रदान गर्नेछ । विशेष अवार्डको विजेताले १ लाख ३२ हजार कर सहित प्राप्त गर्नेछन् । विशेष अवार्ड नेपाली क्रिकेटमा विशेष योगदान पुर्याउने एक खेलाडीलाई प्रदान गरिनेछ ।

अवार्डको मुख्य प्रायोजकमा शिक्षा क्षेत्रमा समर्पित संस्था एनसिसिएस रहनेछ । एनसिसीएस सिप्यान क्रिकेट अवार्डमा पछिल्लो दुई वर्षको खेलाडीको प्रदर्शन, गतिविधी, विशेष क्षणलाई हेरेर मनोनय सार्वजनिक गरेको हो ।