काठमाडौं (हाम्रो खेलकुद) – नेपाल क्रिकेट संघ (क्यान) को आयोजनामा हुने नेपाल टि२० लिगका थप दुई टोली घोषणा भएका छन् । क्यानले बिहीबार एक पत्रकार सम्मेलन गर्दै पोखरा एभेन्चर्स र फार वेस्टन युनाइटेडको नाम सार्वजनिक गरेको हो ।

यसअघि कान्तिपुर क्यापिटल, जनकपुर रोयल्स, विराटनगर सुपरकिंग्स र लुम्बिनी अल स्टार्सको नाम सार्वजनिक गरेको थियो । योसँगै नेपाल टि२० लिग खेल्ने ६ फ्रेन्चाइज टोलीको नै घोषणा भएको छ ।

पोखरा एभेन्चर्सको अध्यक्षमा पोस्टराज ज्ञवाली, निर्देशकमा सुवोध त्रिपाठी र सिइओमा अतिशा ज्ञवाली रहेका छन् । यता फार वेस्टन युनाइटेडको भने इंग्ल्यान्डकाको एस आर स्पोर्ट्स एण्ड भेन्चर्स, च्याटर एकाउन्टेड रुपिन्दर बग्गा रहेकी छिन् ।

पोखरा एभेन्चर्सका अध्यक्ष पोष्टराजले क्यान र थ्रि सेभेन स्पोर्ट्सलाई धन्यावाद दिए । आफूहरुले पनि खेलकुद र नेपाली क्रिकेटमा योगदान दिन चाहेको बताए । निर्देशक सुबोधले यसले पर्यटनमा पनि फाइदा पुग्ने बताए ।

‘पोखरा भनेपछि पर्यटको शहर भनेर चिन्छन् । त्यो पोखराको शहर भएर प्रतिनिधित्व गर्न पाउँदा खुसी छौं । यसले ग्लोबल चिनाउन सकिन्छ । पोखरामा नयाँ एर्पोट पनि बनेको छ । हाम्रो चाहना भनेको नेपाली खेलाडीलाई अनुभव दिनु हो । अन्तर्राष्ट्रिय त्यहिँ स्तरकोमा ध्यान केन्द्रित गरेका छौं । नेपाली खेलाडीमा अनुभवको कमी हो । त्यो खाडललाई यसले रोक्न सक्छ । हामी विश्व स्तरिय अन्तर्राष्ट्रिय मेन्टर घोषणा गर्दै छौं’, निर्देशक त्रिपाठीले भने ।

नेपाल टि२० लिग आगमी असोज ८ देखि कार्तिक ५ (सेप्टेम्बर २४ देखि अक्टोबर २२) सम्म आयोजना हुने यसअघि नै सार्वजनिक भएको थियो । प्रतियोगिता होम तथा अवेका रुपमा गरि डबल राउन्ड रोबिनको आधारमा हुनेछ । खेल दिउँसो हुनेछ ।

प्रतियोगितामा ए ग्रेडमा रहेका खेलाडीले १५ लाख, बी ग्रेगमा रहने खेलाडीले १० लाख र सी ग्रेडमा रहने खेलाडीले ५ लाख रुपैयाँ न्यूनतम पाउने छन् । एक टोलीमा ११ नेपाली खेलाडी र ५ विदेशी खेलाडी रहनेछन् । डाफ्ट शनिबार गर्ने तयारी गरिएको छ ।