एजेन्सी – पाकिस्तानले टि२० एसिया कप २०२२ को सुपर फोर खेलमा भारतविरुद्ध पहिला फिल्डिङ गर्ने भएको छ । दुबई इन्टरनेशल क्रिकेट स्टेडियममा पाकिस्तानका कप्तान बाबर आजमले टस जितेर पहिला फिल्डिङ गर्ने निर्णय लिएका हुन् ।

पाकिस्तानले आजको खेलमा एक परिवर्तन गरेको छ । घाइते शाहनवाज दाहनीको स्थानमा तीव्र गतिका बलर मोहम्मद हसनैनलाई मौका दिएको छ । भारतले टोलीमा तीन परिवर्तन गरेको छ । अलराउन्डर हार्दिक पान्ड्या, दीपक हुडा र रवि विश्रोईले आज प्लेइङ ११ मा स्थान बनाएका छन् । दीनेश कार्तिक, आवेश खान र रविन्द्र जडेजा बेन्चमा छन् । जडेजा चोटका कारण प्रतियोगिता गुमाई सकेका छन् ।

भारतले समूह चरणको खेलमा पाकिस्तानलाई ५ विकेटले हराएको थियो । भारत त्यो नतिजालाई निरन्तरता दिन चाहन्छ । पाकिस्तान समूह चरणको हारको बदला लिने सोचमा हुनेछ ।

हेड टु हेड :

पाकिस्तान र भारतबीच टि२० आईमा हालसम्म १० खेल भएको छ । भारत ८ खेलमा जित र २ मा हार बेहोरेको छ । गतवर्ष टि२० विश्वकपमा पाकिस्तानले भारतलाई १० विकेटले हराएको थियो ।

पाकिस्तानको प्लेइङ ११ :

बाबर आजम (कप्तान), शादब खान, आसिफ अली, फखार जमान, हरिस रौफ, इफ्तिखर अहमद, खुशदील शाह, मोहम्मद नवाज, मोहम्मद रिजवान (विकेटकिपर), नसिम शाह र मोहम्मद हसनैन ।

भारतको प्लेइङ ११ :

रोहित शर्मा (कप्तान), लोकेश राहुल, विराट कोहली, सूर्यकुमार यादव, ऋषभ पन्त (विकेटकिपर), दीपक हुडा, युजभेन्द्र चहल, भुवनेश्वर कुमार, अर्शदीप सिंह, हार्दिक पान्ड्या र रवि विश्रोई ।