काठमाडौं (हाम्रो खेलकुद)– एसिसी यू १९ एसिया कप क्रिकेट प्रतियोगिता भाग लिएर नेपाली युवा क्रिकेट टोली मंगलबार राती स्वदेश फर्केको छ । सन्दीप लामाछिनेको नेतृत्वमा रहेको युवा टोलीले समूह चरणका तीनमध्ये अन्तिम खेल जितेको थियो ।

प्रतियोगिताको महिना दिन भित्रमा देशका ६ ठाँउमा खेलाडी छनोट गर्दै टोली तयार पारेको नेपालले दुई खेलमा हार बेहोरेपनि अपेक्षा भन्ने राम्रो प्रदर्शन गरेको थियो । श्रीलंका र भारतजस्ता क्रिकेटमा क्रिकेटमा स्थापित देशलाई पनि नेपाली टोली चुनौति दिन सफल भएको थियो । पहिलो खेलमै आयोजक श्रीलंकासँग २ सय २८ रनको लक्ष्य पछ्याउने क्रममा १ रनको हार बेहोरेको नेपालले अर्को खेलमा भारतसँग ६ विकेटको हार बेहोरेको थियो ।

सुरुआती दुई खेलमा भन्दा मलेसियासँग केही कमजोर देखिएपनि अन्ततः नेपाली टोली १ विकेटले जित हासिल गर्न सफल भएको थियो । नवौं विकेटका लागि पवन श्राफ र अनिल शाहले ३९ रनको साझेदारी गरेपनि नेपालले १ सय ५४ रनको लक्ष्य प्राप्त गरेको थियो । युवा टोलीलाई राष्ट्रिय टोलीका पूर्व कप्तान विनोद दासले प्रशिक्षण दिएका थिए ।

निर्वाचित नेपाल क्रिकेट संघ (क्यान) ले सिओओबाट पद मुक्त गरेकै दिन छुम्मी लामा, प्लाजाका ग्रुपका अध्यक्ष युवराज श्रेष्ठले युवा टोलीलाई त्रिभुवन विमानस्थलमा स्वागत गरेका थिए ।