काठमाडौंं (हाम्रो खेलकुद) – रकिप पटेल र कोलिन्स ओबुयाको अर्धशतकमा घरेलु टोली केन्याले पहिलो एकदिवसिय अभ्यास खेलमा नेपाललाई २ सय १९ रनको मध्यम लक्ष्य दिएको छ । नैरोबीमा रहेको जिमखाना क्लब ग्राउन्डमा टस जितेर पहिला ब्याटिङ थालेको केन्या ४८.१ ओभरमा २ सय १८ रनमा अल आउट भयो ।

केन्याका रकिप पटेलले ७४ बलमा ७ चौका र २ छक्कासहित सर्वाधिक ६७ रन बनाए । कोलिन्स ओबुयाले १ सय १८ बलमा ३ चौका र २ छक्कासहित ६२ रनमा आउट भए । पाँचौं विकेटका लागि लागि रकिप र ओबुयाले १ सय ३० रनको शतकीय साझेदारी गर्दै राम्रो योगफलको आधार तय गरेका थिए । तर त्यसपछिका ब्याटरले राम्रो प्रदर्शन गर्न सकेनन् ।

यी दुई खेलाडीबीचको शतकीय साझेदारी आदिल अन्सारीले पटेललाई रोहित पौडेलबाट क्याच गराउँदै तोडेका थिए । तीव्र गतिका बलर सोमपाल कामीले पहिलो ओभरको पाँचौं बलमा ओपनर सुखदीप सिंहलाई ५ रनमा कट एण्ड बोल्ड आउट गरे । करण केसीले चौथो ओभरको दोस्रो बलमा एलेक्स ओबान्डालाई शून्यमा विकेटकिपर अर्जुन साउदबाट क्याच गराए ।

नवौं ओभरको दोस्रो बलमा नेल्सनलाई सोमपालले दुई रनमा एलबीडब्लू आउट गरे । १३ औं ओभरको पाँचौं बलमा पवन सरार्फले इफरान करिमलाई ३० रनमा बोल्ड आउट गरे । करिमले ४१ बलमा ५ चौका र १ छक्का प्रहार गरे ।

तल्लोक्रमका सचिन भुडियाले २१ बलमा १ चौका र २ छक्कासहित २६ रनमा रन आउट भए । नेपालका सोमपाल कामीले १० ओभरमा १ मेडनसहित २९ रन खर्चेर ३ विकेट लिए । करण केसीले ९.१ ओभरमा ३ मेडनसहित ३८ रन खर्चेर ३ विकेट लिए । आदिल अन्सारी र पवन सरार्फले एक एक विकेट लिए ।

सिरिज तीन खेलको एकदिवसिय अभ्यास खेल हुनेछ । तीन एकदिवसिय अभ्यास खेलमा नेपालको कप्तानी युवा ब्याटर रोहित पौडेलले गरेका छन् । सन्दीप लामिछाने भने टि२० आई सिरिजपछि क्यारेवियन प्रिमियर लिग (सिपिएल) खेल्न वेस्टइन्डिज गएका छन् । पाँच टि२० आई खेलको सिरिज नेपालले ३–२ ले जितेको थियो ।