एजेन्सी – मध्यक्रमका ब्याटर रकिप पटेल र इफरान करिमले सानदार शतकीय अविजित साझेदारीमा घरेलु टोली केन्याले तेस्रो टि२० आई खेलमा नेपाललाई १ सय ५७ रनको कठिन लक्ष्य दिएकोछ । जिमखाना क्रिकेट क्लब ग्राउन्डमा टस जितेर पहिला ब्याटिङ थालेको केन्याले निर्धारित २० ओभरमा २ विकेट गुमाउँदै १ सय ५७ रन बनायो ।

केन्याका रकिप पटेल ४३ बलमा ५ चौका र ४ छक्कासहित सर्वाधिक ७३ रनमा अविजित रहे । विकेटकिपर इफरान करिम ४७ बलमा ४ चौका र २ छक्कासहित ५५ रनमा अविजित रहे । तेस्रो विकेटका लागि रकिप र करिमले १ सय २७ रनको सानदार अविजित शतकीय साझेदारी गरेका थिए ।

रकिप पटेलले १८ औं ओभरको अन्तिम बलमा करण केसीलाई छक्का हान्दै यस सिरिजमा अर्धशतक हान्ने पहिलो खेलाडी बने । तीव्र गतिका बलर सोमपाल कामीले पाँचौं ओभरको दोस्रो बलमा सुखदीप सिंहलाई ८ रनमा सन्दीप लामिछानेबाट क्याच गराए । उनले १२ बलमा १ चौका हाने ।

आदिल अन्सारीले छैटौं ओभरको अन्तिम बलमा कोलिन्स ओबुयालाई १४ रनमा बोल्ड गरे । १८ बल खेल्दै उनले १ चौका र १ छक्का प्रहार गरे । ओबुया आउट हुँदा केन्या २९-२ को अवस्थामा थियो । त्यसपछि नेपालले तेस्रो विकेट लिन सकेन । अन्तिम ओभरमा दीपेन्द्रसिंह ऐरीलाई १९ रन प्रहार गर्दै केन्याले बलियो योगफल बनाएको थियो ।

सन्दीप लामिछानेले ४ ओभरमा ४२ रन खर्चेर विकेट लिन सकेनन् । दीपेन्द्रसिंह ऐरीले ३ ओभरमा ३१ रन खर्चिए । सोमपाल कामीले ३ ओभरमा १६ रन खर्चेर १ विकेट लिए । करण केसीले ३ ओभरमा २० रन खर्चेपनि विकेट लिनसकेनन् । आदिल अन्सारीले १ ओभरमा ४ रन खर्चेर १ विकेट लिए । पवन सरार्फले २ ओभरमा ९ रन खर्चिए ।