एजेन्सी – नेपालले तेस्रो टि२० आई खेलमा केन्यासँग टस हारेर पहिला फिल्डिङ गर्ने भएको छ । नैरोबीमा रहेको जिमखाना क्रिकेट क्लब ग्राउन्डमा केन्याले टस जित्दै पहिला ब्याटिङ गर्ने निर्णय लिएको छ । पाँच टि२० आई खेलको सिरिज १–१ को बराबरीमा छ ।

नेपाल पहिलो खेलमा ५ विकेटले विजयी हुँदा दोस्रो खेलमा १८ रनले पराजित भएको थियो । नेपालले दोस्रो खेलमा १ सय ३३ रनको विजयी लक्ष्य पछ्याउनेक्रममा १ सय १४ रनमा अल आउट भएको थियो ।

त्यसैको कारण केन्याले पहिला ब्याटिङ गर्ने निर्णय लिएको हुनसक्छ । नेपाली ब्याटरले सट छनोटमा विशेष ध्यादिनुपर्ने हुन्छ । जिम्मेवारी लिएर खेल्नुपर्ने हुन्छ । गैरजिम्मेवारी ब्याटिङ ठूलो समस्याको रुपमा रहँदै आएको छ ।

दोस्रो खेलमा रकिब पटेल २५ बलमा ३५ रन बनाउँदै प्लेयर अफ द म्याच चुनिएका थिए । केन्याका लुकास ओलुओच विष्फोटक ब्याटिङ गर्न सक्छन् । पहिलो खेलमा उनले १२ बलमा ३१ रन जोडेका थिए । किकेटकिपर इफरान करिम, सचिन भुडिया र नहेमायाह ओधिआम्बो केन्याका राम्रा ब्याटर हुन् ।

बलरमा दोस्रो खेलमा नेपाललाई हराउन इमानुएल बुन्डी, लुकास र विरज पटेलले दुई दुई विकेट लिएका थिए । केन्याले घरेलु मैदान र कन्डिसनको फाइदा उठाउँदै सिरिजमा अग्रता लिन चाहन्छ ।

नेपालको प्लेइङ ११ :

सन्दीप लामिछाने (कप्तान), रोहित पौडेल, अर्जुन साउद (विकेटकिपर), आरिफ शेख, दीपेन्द्रसिंह ऐरी, आदिल अन्सारी, करण केसी, ज्ञानेन्द्र मल्ल, सोमपाल कामी, साहब आलम र पवन सरार्फ ।