एजेन्सी – कप्तान बेन स्टोक्स र विकेटकिपर बेन फोक्सको शतकमा इंग्ल्यान्डले दोस्रो टेस्ट खेलमा दक्षिण अफ्रिकालाई ८५ रनको इनिङ अन्तरले पराजित गरेको छ । योसँगै तीन टेस्ट खेलको सिरिज १-१ को बराबरीमा पुगेको छ ।

म्यानचेस्टरमा दक्षिण अफ्रिकाले टस जितेर पहिला ब्याटिङ गर्दै १ सय ५१ रनमा अल आउट भएको थियो । दक्षिण अफ्रिकाका कागिसो रबाडाले ७२ बलमा २ चौकासहित सर्वाधिक ३६ रन बनाए । किगन पिटरसन २१, एडेन माक्ररम १४ र रास्सी भान डर डुसेन १६ रनमा आउट भए ।

इंग्ल्यान्डका जेम्श एन्डरसन र स्टुअर्ट ब्रोडले तीन तीन विकेट लिए । स्टोक्सले दुई, ओली रोबिन्सन र ज्याक लिचले एक एक विकेट लिए ।

इंग्ल्यान्डले ४१५–९ को अवस्थामा पहिलो इनिङ समाप्तिको घोषणा गरेको थियो । पहिलो इनिङमा इंग्ल्यान्डले २ सय ६४ रनको अग्रता लिएको थियो । इंग्ल्यान्डका बेन फोक्स २ सय १७ बलमा ९ चौकासहित १ सय १३ रनमा अविजित रहे । उनको टेस्ट करिअरको दोस्रो शतक हो ।

स्टोक्सले १ सय ६३ बलमा ६ चौका र ३ छक्कासहित १ सय ३ रनको शतकीय इनिङ खेले । कप्तानको रुपमा स्टोक्सको पहिलो र करिअरको १२ औं टेस्ट शतक हो ।

छैटौं विकेटका लागि स्टोक्स र फोक्सले १ सय ७३ रनको शतकीय साझेदारी गरेका थिए । ज्याक क्रली ३८, जोनी बेयरस्टो ४९ र ओली पोप २३ रनमा आउट भए । दक्षिण अफ्रिकाका एनरिच नोर्कियाले सर्वाधिक तीन विकेट लिए । कागिसो रबाडा र केशव महाराजले दुई दुई विकेट लिए ।

दक्षिण अफ्रिका दोस्रो इनिङमा १ सय ७९ रनमा अल आउट भयो । दक्षिण अफ्रिका किगन पिटरसनले १ सय ५९ बलमा १ चौकासहित सर्वाधिक ४२ रन बनाए । रास्सी भान डर डुसैनले १ सय ३२ बलमा ५ चौकासहित ४१ रनमा आउट भए । अन्यले राम्रो प्रदर्शन गर्न सकेनन् ।

इंग्ल्यान्डका ओली रोविन्सनले सर्वाधिक चार विकेट लिए । जेम्श एन्डरसनले तीन र बेन स्टोक्सले दुई विकेट लिए । पहिलो खेलमा दक्षिण अफ्रिका १२ रनको इनिङ अन्तरले विजयी भएको थियो । तेस्रो खेल सेप्टेम्बर ८ देखि सुरुहुनेछ ।