एजेन्सी – वर्तमान समयमा विश्व क्रिकेटका उत्कृष्ट लेगस्पिनर राशिद खान आफ्नो अन्तर्राष्ट्रिय करिअरमा पहिलो पटक लगातार तीन खेलमा विकेट विहीन वनेका छन् ।

अफगानिस्तानका राशिद खान आयरल्यान्डसँगको सुरुवाती तीन टि२० आई खेलमा लगातार विकेट विहीन बनेका हुन् । पाँच टि२० आई सिरिजमा अफगानिस्तान २–१ ले पछि छ । सुरुवाती दुई खेल गुमाएको अफगानिस्तानले शुक्रबार राती तेस्रो खेलमा आयरल्यान्डलाई २२ रनले पराजित गर्यो ।

राशिद खानले ४ ओभरमा ३८ रन खर्चिदा विकेट लिन सकेनन् । त्यसअघि पहिलो र दोस्रो खेलमा समान चार ओभर बलिङ गर्दा क्रमश : २५ र २७ रन खर्चेका थिए । राशिद खानले खेलेका पछिल्ला चार खेलमा विकेट लिन सकेका छैनन् । एक खेल भने इंग्ल्यान्डको घरेलु टि२० थियो छ ।

राशिद खानले ५ टेस्ट खेल खेल्दा ३४ विकेट लिएका छन् । कुनैपनि खेलमा विकेट विहीन बन्नु परेको छैन । राशिद ओडिआई खेलमा भने लगातार दुई पटक विकेट विहीन बनेका थिए । राशिद २०१९ को एकदिवसिय विश्वकपमा लगातार दुई खेलमा विकेट विहीन बनेका थिए ।

इंग्ल्यान्डविरुद्ध विश्वकपमा राशिद खानले ९ ओभरमा ११ छक्कासहित १ सय १० रन खर्चेका थिए । जुन कुनैपनि विश्वकपमा एक बलरले खर्चेको सर्वाधिक रन थियो । उक्त खेलमा इंग्ल्यान्डका कप्तान ओईन मोर्गनले ७१ ब्लमा ४ चौका र १७ छक्कासहित १ सय ४८ रनको विष्फोटक इनिङ खेलेका थिए ।

त्यसै विश्वकपमा दक्षिण अफ्रिकाविरुद्ध राशिद खानले ७ ओभरमा ४५ रन खर्चेर विकेट विहीन बनेका थिए । राशिद टि२० आईमा भने यसअघि लगातार दुई पटक समेत विकेट विहीन बन्नु परेको थिएन ।

तेस्रो खेलमा सिभिल सर्भिस क्रिकेट क्लबमा टस जितेर पहिला ब्याटिङ गर्दै अफगानिस्तानले निर्धारित २० ओभरमा ५ विकेट गुमाउँदै १ सय ८९ रन बनाएको थियो । अफगानिस्तानका रहमानउल्लाह गुरबाजले ३५ बलमा ८ चौका र १ छक्कासहित सर्वाधिक ५३ रन बनाए ।

हज्रातुल्लाह जजाई ३९, इब्राहिम जद्रान ३६ र नाजिबउल्लाह जद्रानले ४२ रनमा आउट भए । आयरल्यान्डका जोशुवा लिटिलले सर्वाधिक दुई विकेट लिए ।

जितका लागि १ सय ९० रनको विजयी लक्ष्य पछ्याएको आयरल्यान्डले निर्धारित २० ओभरमा ९ विकेट गुमाउँदै १ सय ६७ रन बनायो । आयरल्यान्डका जर्ज डोकरेलले ३७ बलमा ७ चौका र २ छक्कासहित सर्वाधिक ५८ रन बनाए । फिओन ह्यान्डले १८ बलमा ४ चौका र २ छक्कासहित ३६ रन बनाए ।

एक समय ८५–७ को अवस्थामा पुगेको आयरल्यान्डलाई आठौं विकेटका लागि डोकरेल र ह्यान्डले ७४ रनको साझेदारी गरेका थिए । लोर्कान टकरले २१ बलमा ४ चौका र १ छक्कासहित ३१ रनमा आउट भए ।

अफगानिस्तानका नविन उल हकले ४ ओभरमा ३८ रन खर्चेर ३ विकेट लिए । मुजिब उरहमान र फजलहक फरुकीले दुई दुई विकेट लिए । अव चौथो र पाँचौं खेल सोमबार र बुधबार हुनेछ ।