एजेन्सी – स्पिनर सामू निरिह बन्दै वेस्टइन्डिजले पाँचौं तथा अन्तिम टि२० आई खेलमा भारतसँग लज्जास्पद ब्याटिङका साथ ८८ रनले पराजित भएको छ । योसँगै भारतले सिरिज ४-१ ले जितेको छ ।

जितको लागि १ सय ८९ रनको विजयी लक्ष्य पछ्याएको वेस्टइन्डिज १५.४ ओभरमा १ सय रनमा अल आउट भयो । वेस्टइन्डिजका शिम्रन हेटमायरले ३५ बलमा ५ चौका र ४ छक्कासहित सर्वाधिक ५६ रन बनाए । शम्राह ब्रुक्स १३ र डेभन थोमस १० रनमा आउट भए ।

वेस्टइन्डिजका ८ खेलाडीले दोहोरो अंकमा रन बनाउन सकेनन् । जसमध्य पाँच खेलाडीले खाता खोल्न सकेनन् । कप्तान निकोलस पुरन ३ र रोभम्यान पावेल ९ रनमा आउट भए ।

भारतका स्पिनर रवि विश्रोईले २.४ ओभरमा १६ रन खर्चेर ४ विकेट लिए । कुलदीप यादवले ४ ओभरमा १ मेडनसहित १२ रन खर्चेर ३ विकेट लिए । स्पिनर अक्षर पटेलले ३ ओभरमा १ मेडनसहित १५ रन खर्चेर ३ विकेट लिए ।

त्यसअघि टस हारेर पहिला ब्याटिङ थालेको भारतले निर्धारित २० ओभरमा ७ विकेट गुमाउँदै १ सय ८८ रन बनाएको थियो । भारतका ओपनर श्रेयस ऐरले ४० बलमा ८ चौका र २ छक्कासहित सर्वाधिक ६४ रन बनाए । कप्तान हार्दिक पान्ड्या १६ बलमा २ चौका र २ छक्कासहित २८ रनमा रन आउट भए ।

ओपनर ईशान किशन ११ र दीपक हुडा ३८ रनमा आउट भए । हुडाले २५ बलमा ३ चौका र २ छक्का प्रहार गरे । सञ्जु स्यामसन १५ र दीनेश कार्तिक १२ रनमा आउट भए । वेस्टइन्डिजका ओडेन स्मिथले ४ ओभरमा ३३ रन खर्चेर ३ विकेट लिए । जेसन होल्डर, डोमिनिक डे«क्स र हायडन वेल्स जुनियरले एक एक विकेट लिए ।