एजेन्सी – विश्व क्रिकेटका दुई चर्चित टोली भारत र पाकिस्तान यसै महिना अन्तिममा युएईमा सुरुहुने एसिया कप टि२० प्रतियोगितामा एकै समूहमा छन् ।

एसिया कप अगष्ट २७ देखि ११ सेप्टेम्बरसम्म युएईमा हुनेछ । समूह ए मा भारत, पाकिस्तान र क्वालिफायरबाट आएको एक टोली हुनेछ । समूह बी मा श्रीलंका, बंगलादेश र अफगानिस्तान छन् । शीर्ष दुई दुई टोलीले सुपर फोरमा प्रतिस्पर्धा गर्नेछन् । सुपर फोरमा शीर्ष दुई स्थानमा रहने टोली फाइनलमा प्रतिस्पर्धा गर्नेछन् ।

एसिया कपमा भारत र पाकिस्तानबीच अगष्ट २८ मा दुबई मैदानमा खेल हुनेछ । उद्धघाटन खेलमा अगष्ट २७ मा श्रीलंका र अफगानिस्तानबीच प्रतिस्पर्धा हुनेछ । एसिया कप छनोट भने २० अगष्ट देखि २६ सम्म युएईमा हुनेछ । एसिया कप छनोटमा हङकङ, युएई, सिंगापुर र कुवेत छन् । यी चार टोलीबाट शीर्ष स्थानमा रहने टोली एसिया कपमा भारत र पाकिस्तानसँग खेल्न पाउनेछ ।

एसिया कप आगमी अक्टोबर १६ देखि अष्ट्रेलिया सुरु हुने टि२० विश्वकपको लागि तयारी हुनेछ । नेपाल भने दुई वर्षअघि थाईल्यान्डमा सम्पन्न इस्टर्न रिजनमा खराब प्रदर्शन गर्दै एसिया कप छनोट खेल्ने अवसर गुमाएको थियो । उक्त छनोटमा नेपाल मलेसिया र हङकङसँग पराजित हुँदै चौथो स्थानमा रहेर बाहिरिएको थियो ।

टि२० विश्वकपमा पनि भारत र पाकिस्तान एकै समयमा छन् । भारत र पाकिस्तानबीच टि२० विश्वकपमा आगमी अक्टोबर २३ मा मेलबर्नमा हुनेछ । गतवर्ष युएईमा भएको टि२० विश्वकपमा भने पाकिस्तानले भारतलाई १० विकेटले हराएको थियो । विश्वकप इतिहासमा पाकिस्तानले पहिलो पटक भारतलाई हराएको थियो । आन्तरिक कारण भारत र पाकिस्तानले भने सिरिज खेल्दैनन् । आइसिसी र एसिसीको प्रतियोगितामा मात्र भिड्ने गर्दछन् ।

एसिया कपको खेल तालिका