एजेन्सी – कप्तान रोहित शर्माको अर्धशतक र दीनेश कार्तिकको उत्कृष्ट अन्त्यमा भारतले पहिलो टि२० आई खेलमा घरेलु टोली वेस्टइन्डिजलाई १ सय ९१ रनको चुनौतीपूर्ण लक्ष्य दिएको छ ।

ब्रायन लारा क्रिकेट स्टेडियममा टस हारेर पहिला ब्याटिङको निम्तो पाएको भारतले निर्धारित २० ओभरमा ६ विकेट गुमाउँदै १ सय ९० रन बनायो । भारतका रोहित शर्माले ४४ बलमा ७ चौका र २ छक्कासहित सर्वाधिक ६४ रन बनाए । रोहितको यो २७ औं टि२० आई शतक हो ।

भारतले रोहित र सूर्यकुमार यादवलाई ओपनिङ गराएको थियो । सूर्य स्पिनर अकिल हुसैनको बलमा एज लागेर २४ रनमा जेसन होल्डरबाट क्याच आउट भए । सूर्यले १६ बलमा ३ चौका र १ छक्का प्रहार गरे । तीव्र गतिका बलर ओबेद म्याकोयको बलमा श्रेयस ऐर शून्यमा अकिल हुसैनबाट क्याच आउट भए ।

ऋषभ पन्त १४, हार्दिक पान्ड्या १ र रविन्द्र जडेजा १६ रनमा आउट भएपछि भारतको विशाल योगफलको सम्भावना टाढिएको थियो । तल्लोक्रमका दीनेश कार्तिक १९ बलमा ४ चौका र २ छक्कासहित ४१ रनमा अविजित रहे । आश्विन १३ रनमा अविजित रहे । सातौं विकेटका लागि कार्तिक र आश्विनले ५२ रनको अविजित साझेदारी गरेका थिए ।

वेस्टइन्डिजका अल्जारी जोशेफले ४ ओभरमा ४६ रन खर्चेर २ विकेट लिए । ओबेद म्याकोय, अकिल हुसैन, जेसन होल्डर र किमो पउलले एक एक विकेट लिए।