एजेन्सी – भारतीय क्रिकेटको सर्वोच्च निकाय द बोर्ड अफ अक्ट्रोल फर क्रिकेट इन इन्डिया (बिसिसिआई) ले आफ्ना खेलाडीलाई विदेशी लिग खेल्न दिने सम्भावना बढेको छ । पछिल्लो समय भारतीय क्रिकेटमा चर्चाको विषय बिसिसिआईको आगमी सेप्टेम्बरमा हुने वार्षिक साधरण सभाबाट टुङ्गो लाग्नेछ ।

भारतका खेलाडीले बिसिसिआईको अनुमतिमा इंग्ल्यान्डको काउन्टी क्रिकेट खेलेपनि विदेशी लिग भने खेल्दैनन् । इन्डियन प्रिमियर लिग (आइपिएल) का फ्रेन्चाइज टोलीले नै आफ्ना खेलाडीहरुले विदेशको टि२० लिग खेल्न दिनुपर्ने प्रस्ताव राखेपछि उक्त सम्भावना बढेको हो । हाल भारतमा स्टेटको सम्झौतामा रहेका खेलाडीले पनि बाहिर गएर खेल्न अनुमति दिइने गरेको छैन ।

गत साता मात्र आइपिएलका ६ फ्रेन्चाइज टोलीको स्वामित्व रहेको विभिन्न कम्पनिले दक्षिण अफ्रिकामा हुने टि२० च्यालेन्ज प्रतियोगिताको टोली खरिद गरेका थिए । आइपिएलका तिनै फ्रेन्चाइज टोलीको दबाबमा बिसिसिआईले अनुमति दिन विचार गरेको भारतीय मिडियाहरुमा चर्चा छ । यसको अन्तिम निर्णय वार्षिक साधारण सभाबाट थाहा हुनेछ ।

‘विदेशी लिगमा उपस्थिति भएका केहि आइपिएल टोलीले भारतीय खेलाडीहरुलाई अनुमति दिन बिसिसिआईलाई आग्रह गरेका छन् । तर यसको कुनै निष्कर्षमा पुग्न यसबारे वार्षिक साधरण सभामा छलफल गर्नुपर्छ । यो विवादस्पद विषय हो । विदेशमा भारतीय खेलाडी खेल्न नदिँदा नै आइपिएल सफल भएको छ’, बिसिसिआईका एक वरिष्ठ अधिकारीले इनसाइड स्पोर्ट्ससँग भनेका छन् ।

बिसिसिआईले भारतीय महिला खेलाडीलाई भने विदेशमा खेल्न अनुमति दिएको छ । पुरुषतर्फ भने भारतबाट सन्न्यास लिएका केहि खेलाडीले भने विदेशमा फ्रेन्चाइज टि२० लिग खेलेका छन् । तर उनीहरुलाई पुन भारतीय घरेलु क्रिकेटमा फर्किन कडाई गर्दै आएको छ । बिसिसिआई भारतीय खेलाडी विदेशी लिग खेल्दा आइपिएलले आफ्नो विशेषता गुमाउने विश्वास राख्दै आएको छ ।

बिसिसिआईले भारतीय खेलाडीलाई विदेशी खेलाडी खेल्न अनुमति दिएपनि शीर्ष श्रेणीका केन्द्रिय सम्झौतामा रहेका खेलाडीलाई खेल्न अनुमति दिने सम्भावना भने निकै कम छ । अर्थात रोहित शर्मा, विराट कोहली, लोकेश राहुल, जस्प्रित बुमराह, हार्दिक पान्ड्या जस्ता खेलाडी अन्य लिग खेल्न पाउने छैनन् । युवा खेलाडीलाई विकासको लागि वा टोलीबाट बाहिर रहेका खेलाडीलाई दिने सम्भावना छ ।

बिसिसिआई आइपिएलको कारण सबैभन्दा धनी क्रिकेट संस्था बनेको छ । आइपिएलले २०२३ देखि २०२७ सम्मको लागि मिडिया अधिकार ४८, ३९० करोड भारुमा बेचेको थियो । आइपिएल सर्वाधिक लोकप्रिय फ्रेन्चाइज क्रिकेट प्रतियोगिता पर्दछ ।