काठमाडौं (हाम्रो खेलकुद) – नेपाली राष्ट्रिय क्रिकेट टोलीका कप्तान तथा लेगस्पिनर सन्दीप लामिछानेले ओडिआई क्रिकेटमा अफगानिस्तानका विश्व चर्चित राशिद खानलाई पछि पार्दै दुर्लभ कीर्तिमान कायम गरेका छन् ।

सन्दीपले ओडिआई क्रिकेटको बलिङ एभरेज (औसत) तर्फ कीर्तिमान बनाएका हुन् । सन्दीप विश्व ओडिआई क्रिकेट इतिहासमा सबैभन्दा कम औसतमा बलिङ गर्ने खेलाडी हुन् । ओडिआई क्रिकेट सन् १९७१ देखि सुरु हुँदा सन्दीपले उक्त कीर्तिमान आफ्नो नाम गरेका हुन् । सन्दीपले ओडिआईको ५१ वर्षको इतिहास हुँदा खेल्न थालेको छोटो समयमा नै कीर्तिमान बनाएका छन् ।

सन्दीपले ३० ओडिआई खेलमा १ हजार ६ सय २ बल गर्दै १ हजार ७५ रन खर्चेर ६९ विकेट लिएका छन् । उनको प्रति विकेट औसत रन १५.५७ रहँदा ४.०२ को ईकोनमीमा रन खर्चेका छन् । उनले करिअरमा एकै इनिङमा दुई पटक ६–६ विकेट हात पारेका छन् । सन्दीपको उत्कृष्ट प्रदर्शन ६–११ छ । अफगानिस्तानका राशिद खानले २०१५ देखि ओडिआई खेल्न सुरु गर्दा ८३ खेलमा ४ हजार २ सय ४१ बल गर्दै कुल २ हजार ९ सय ४७ रन खर्चेर १ सय ५८ विकेट लिएका छन् ।

राशिदको औसत १८.६५ रहँदा इकोनमी ४.१६ छ । सन्दीपले राशिदको औसतलाई ३.०८ को औसतले पछि पारेका हुन् । राशिदको उत्कृष्ट प्रदर्शन ७–१८ छ । अर्थात औसत अनुसार सन्दीपले झन्डै १६ रन खर्चदा एक विकेट लिने गर्दछन् । राशिदले १९ रन खर्चिदा एक विकेट हात पार्दछन् । क्रिकेटमा बलिङ औसत बलरले खर्चेको कुल रनलाई लिएको विकेटले भाग गर्नुपर्ने हुन्छ । त्यसबाट आउने अंक नै औसत मानिन्छ ।

सन्दीपले २०१८ मा नेदरल्यान्ड्सविरुद्ध ऐतिहासिक पहिलो ओडिआईमा डेब्यू गरेका थिए । त्यसपछि सन्दीप प्रमुख बलरको रुपमा खेलेका छन् । सन्दीपले आफ्नो कप्तानीमा १४ ओडिआई खेलमा २८ विकेट, पारसको कप्तानीमा ६ खेलमा १५ र ज्ञानेन्द्र मल्लको कप्तानीमा १० खेलमा २६ विकेट लिएका छन् ।

विश्वकप लिग–२ त्रिकोणात्मक ओडिआई सिरिजमा सन्दीपले २० खेलमा ४२ विकेट लिएका छन् । सन्दीप वर्तमान एसोसियट क्रिकेटका प्रमुख बलरमा पर्दछन् ।