एजेन्सी – न्युजिल्यान्डका स्पिन अलराउन्डर माइकल ब्रेसवेलले आफ्नो टि२० करिअरको पहिलो ओभरमै ह्याट्रिक लिएका छन् । उनले दोस्रो टि२० आई खेलमा घरेलु टोली आयरल्यान्डविरुद्ध १४ औं ओभरमा ह्याट्रिक लिएका हुन् ।

जितको लागि १ सय ८० रनको विजयी लक्ष्य पछ्याएको आयरल्यान्ड ९१ रनमा अल आउट भयो । आयरल्यान्डका मार्क आदिरले २२ बलमा ४ चौका र १ छक्कासहित सर्वाधिक २७ रन बनाए ।

न्युजिल्यान्डका माइकल ब्रेसवेलले पाँच बल गर्दै ह्याट्रिक लिए । उनले १४ औं ओभरको तेस्रो बलमा मार्क आदिरलाई ग्लेन फिलिप्सबाट क्याच गराए । चौथो बलमा ब्यारी म्याकार्थी फिलिप्सबाटनै ११ रनमा आउट भए । उनले पाँचौं बलमा प्वाइन्टमा क्रेग योंगलाई ईश सोधीबाट क्याच गराउँदै आफ्नो टि२० करिअरको पहिलो ओभरमै ह्याट्रिक लिन सफल भए ।

उनी न्युजिल्यान्डबाट टि२० आईमा ह्याट्रिक गर्ने ज्याकोब ओरम र टिम साउथीपछि तेस्रो बलर हुन् । अफ स्पिन बलिङ गर्ने उनले ब्याटिङ पनि राम्रो गर्ने गर्दछन् । उनले आयरल्यान्डसँगको पहिलो टि२० आईमा डेब्यू गरेका थिए ।

ब्रेसवेलले न्युजिल्यान्डलाई आयरल्यान्डसँगको पहिलो ओडिआई खेलमा अप्रत्याशित हारबाट जोगाएका थिए । जितको लागि ३ सय १ रनको विजयी लक्ष्य न्युजिल्यान्डले सातौं नम्बरका ब्याटर ब्रेसवेलको १ सय २७ रनको अविजित शतकमा एक यादगार जित दिलाएका थिए ।

त्यसअघि सिभिल सर्विस क्रिकेट क्लब, बेलफास्टमा टस हारेर पहिला ब्याटिङ गरेको न्युजिल्यान्डले निर्धारित २० ओभरमा ४ विकेट गुमाउँदै १ सय ७९ रन बनायो । न्युजिल्यान्डका विकेटकिपर क्लेभर डेनले ५५ बलमा ५ चौका र ४ छक्कासहित सर्वाधिक ७८ रन बनाए । करिअरको दोस्रो टि२० आई खेल खेलेका उनको यो उच्च प्रदर्शन हो ।

आयरल्यान्डका क्रेग योंग र लिटिल जोशुआले दुई दुई विकेट लिए । पहिलो खेलमा न्युजिल्यान्ड ३१ रनले विजयी भएको थियो । तेस्रो खेल शुक्रबार हुनेछ ।