एजेन्सी – टेस्ट क्रिकेटका चर्चित भारतीय ब्याटर मुरली विजयले तामिल नाडु प्रिमियर लिग टि२० क्रिकेटमा विष्फोटक शतक हानेका छन् । विजयले रुबी चित्री वारियर्सबाट नेल्लई किंग्सरोयलविरुद्ध विष्फोेटक शतक प्रहार गरेपनि टोली ६६ रनले पराजित भयो ।

जितको लागि २ सय ३७ रनको विजयी लक्ष्य पछ्याएको रुबीले निर्धारित २० ओभरमा ७ विकेट गुमाउँदै १ सय ७० रन बनायो । रुबीका लागि मुरली विजयले ६६ बलमा ७ चौका र १२ छक्कासहित १ सय २१ रनको विष्फोटक इनिङ खेले । उनी बाहेक अन्य ब्याटरले भने राम्रो प्रदर्शन गर्न सकेनन् ।

रोयल किंग्सका बाबा अपराजिथ र ईश्वरनले दुई दुई विकेट लिए । त्यसअघि टस हारेर पहिला ब्याटिङको निम्तो पाएको रोयल किंग्सले निर्धारित २० ओभरमा २ विकेट गुमाउँदै २ सय ३६ रन बनायो । उसका लागि सञ्जय यादवले ५५ बलमा ६ चौका र ९ छक्कासहित १ सय ३ रनको शतकीय इनिङ खेले । बाबा अराजिथले ४८ बलमा ५ चौका र ८ छक्कसहित ९२ रनमा अविजित रहे ।

मुरली विजयी २०१८ यता भारतीय टेस्ट टोलीमा छैनन् । उनले भारतबाट ६१ टेस्ट, १७ ओडिआई र ९ टि२० आई खेल खेलेका छन् । टेस्टमा १२ शतक र १५ अर्धशतकसहित ३ हजार ९ सय ८२ रन बनाएका छन् ।

२०१० मा चेन्नई सुपरकिंग्सबाट मुरली विजयले रोयल च्यालेन्जर्स बेंगलोरविरुद्ध ५६ बलमा ८ चौका र ११ छक्कासहित १ सय २७ रनको शतकीय इनिङ खेलेका थिए ।