एजेन्सी – जिम्बावे र नेदरल्यान्ड्स आगमी अक्टोबर नोभेम्बरमा अष्ट्रेलियामा हुने टि२० विश्वकपको लागि छनोट भएका छन् । आइसिसी विश्वकप छनोट बी बाट घरेलु टोली जिम्बावे र नेदरल्यान्ड्स फाइनलमा पुग्दै टि२० विश्वकपमा स्थान बनाएका हुन् ।

नेदरल्यान्ड्सले सेमिफाइनलमा अमेरिकालाई ७ विकेटले हरायो । जिम्बावेले पपुवा न्युगिनीलाई २७ रनले हराउँदै फाइनलमा स्थान बनायो ।

पहिलो सेमिफाइनलमा घरेलु टोली जिम्बावे क्विन स्पोर्ट्स क्लबमा टस जितेर पहिला ब्याटिङ गर्दै निर्धारित २० ओभरमा ५ विकेट गुमाउँदै १ सय ९९ रन बनायो । जिम्बावेका युवा ब्याटर विल्सी मधेभेरेले २९ बलमा ५ चौकासहित सर्वाधिक ४२ रन बनाए ।

कप्तान क्रेग एर्विनले ३० बलमा ४ चौका र १ छक्कासहित ३८ र रेजिस चकभा ३० रनमा आउट भए । मिल्टन शुम्बा २९, सिकन्दर राजा र सेन विलियम्सले २२–२२ रन बनाए । पिएनजीकासेसे बाउ र चाल्र्स अमिनीले २–२ विकेट लिए ।

जितको लागि २ सय रनको विशाल लक्ष्य पछ्याएको पपुवा न्युगिनी निर्धारित २० ओभरमा ८ विकेट गुमाउँदै १ सय ७२ रन बनायो । पिएनजीका टोनी उराले ३५ बलमा ४ चौका र ५ छक्कासहित ६६ रनमा आउट भए । २२ बलमा अर्धशतक हान्दै उराले एक समय पपुवा न्युगिनीको जितको सम्भावना बलियो बनाएका थिए ।

सेन विलियम्सको १५ औं ओभरको अन्तिम बलमा उरा बोल्ड आउट भएपछि पपुवा न्युगिनीको जितको सम्भावना टाढिएको थियो । चाल्र्स अमिनी ३१, असाद भाला ७, सेसे बाउ ५ र राइली हेकुरे १७ रनमा आउट भए । जिम्बावेका ब्लेसिङ मुर्जाबानीले सर्वाधिक दुई विकेट लिए ।

दोस्रो सेमिफाइनलमा १ सय ३९ रनको विजयी लक्ष्य पछ्याएको नेदरल्यान्ड्सले १९ ओभरमा ३ विकेट गुमाउँदै पूरा गर्यो । नेदरल्यान्ड्सका बास डी लिडे ६७ बलमा ९ चौका र ३ छक्कासहित ९१ रनमा अविजित रहँदै विश्वकप स्थान पक्का गरे । कप्तान स्कट एडवार्ड २६ र म्याक्स ओडआउड १६ रनमा आउट भए ।

त्यसअघि बुआयोमा टस जितेर पहिला ब्याटिङ थालेको अमेरिका १९.४ ओभरमा १ सय ३८ रनमा अल आउट भयो । अमेरिका मोनाकं पटेल १५ बलमा ५ चौका र १ छक्कासहित ३२ रनमा आउट भए । स्टिभ टेलर २६ र निसर्ग पटेल २८ रनमा आउट भए ।

नेदरल्यान्ड्सका बास डी लिडे र पउल मान मिकरेन २–२ विकेट लिए । नेदरल्यान्ड्स समूह बी र जिम्बावे ए बाट अपराजित रहँदै सेमिफाइनल खेलेका थिए ।