काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिजमा घरेलु टोली स्कटल्यान्डविरुद्ध टस जितेर पहिला फिल्डिङ गर्ने निर्णय लिएको छ । टिटवुड ग्लासगोमा नेपालका कप्तान सन्दीप लामिछानेले टस जितेर पहिला फिल्डिङ गर्ने निर्णय लिएका हुन् । नेपालले टोलीमा कुनैपनि परिवर्तन भने गरेको छैन । नामिबियासँगको टोलीलाई नै निरन्तरता दिएको छ ।

स्कटल्यान्ड लगातार दोस्रो जितको सोचमा छ । नेपाल पहिलो जितको सोचमा हुनेछ । नेपाल पहिलो खेलमा ४० रनले पराजित भएको थियो । नामिबिया पहिलो खेलमा स्कटल्यान्डसँग ७७ रनले पराजित भएको थियो ।

विश्वकप लिग २ मा स्कटल्यान्ड तुलनात्मक रुपमा सबैभन्दा बलियो टोली मानिन्छ । यस लिग २ मा सबैभन्दा कम हार्ने टोली पनि स्कटल्यान्ड नै हो । उसले जम्मा ५ खेल मात्र हारेको छ । घरेलु मैदान र वातावरणको फाइदा उठाउँदै स्कटल्यान्ड नेपालमाथि सहज जित निकाल्न चाहन्छ ।

नेपालले भने उत्कृष्ट ब्याटिङ गर्नुपर्ने हुन्छ । तर पछिल्लो समय ब्याटिङ नेपालको फ्लप छ । नेपाल पहिलो खेलमा खराब ब्याटिङकै कारण नामिबियासँग पराजित भएको थियो । सबै ब्याटरले जिम्मेवारी प्रदर्शन गर्नुपर्ने हुन्छ । नेपालको ब्याटिङमा गहिराई छ । तर जिम्मेवारी छैन । रोहित पौडेल, दीपेन्द्रसिंह ऐरी, कुशल भुर्तेल, आसिफ शेख जस्ता ब्याटरबाट नेपाल उत्कृष्ट प्रदर्शन चाहन्छ ।

स्कटल्यान्डको ब्याटिङ र बलिङ दुबै उत्कृष्ट छ । स्कटल्यान्डको ब्याटिङमा अनुभवी खेलाडी छन् । कप्तान काइल कोट्जर, म्याथ्यु क्रस, कलुम म्याकलेड, रिची बेरिङ्टन र जर्ज मुन्शे जस्ता एसोसियट स्टार ब्याटरले स्कटल्यान्ड धेरै मजबुत बनेको छ । यी मध्य एक ब्याटर क्रिजमा जम्दा स्कटल्यान्डले सहज जित हात पार्नसक्छ ।

स्कटल्यान्डले दुई स्पिनरमा मार्क वाट् र हम्जा ताहिरलाई खेलाउँदै आएको छ । यी दुबैले लगातार राम्रो प्रदर्शन गरेका छन् । शफ्यान शरिफ स्कटल्यान्डका प्रमुख बलिङ हतियार हुन् । एसोसियट क्रिकेटकै एक उत्कृष्ट तीव्र गतिका बलरको रुपमा चर्चित उनले ओडिआईमा ५६ ओडिआईमा ८० विकेट लिई सकेका छन् ।

नेपालको प्लेइङ ११ :

आसिफ शेख (विकेटकिपर), कुशल भुर्तेल, देव खनाल, रोहित पौडेल (उपकप्तान), दीपेन्द्रसिंह ऐरी, आरिफ शेख, आदिल अन्सारी, सोमपाल कामी, करण केसी, सन्दीप लामिछाने (कप्तान) र बसिर अहमद ।