एजेन्सी – डेविड मलान र लियाम लिभिङस्टोन चम्कँदा इंग्ल्यान्डले तेस्रो टि२० आई खेलमा भारतलाई २ सय १६ रनको विशाल लक्ष्य दिएको छ । नोटिङ्घममा टस जितेर पहिला ब्याटिङ थालेको इंग्ल्यान्डले निर्धारित २० ओभरमा ७ विकेट गुमाउँदै २ सय १५ रन बनायो ।

इंग्ल्यान्डका डेविड मलानले ३९ बलमा ६ चौका र ५ छक्कासहित सर्वाधिक ७७ रन बनाए । लियाम लिभिङस्टोनले २९ बलमा ४ छक्कासहित ४२ रनमा अविजित रहे । चौथो विकेटका लागि मलान र लिभिङस्टोनले ४३ बलमा ८४ रनको साझेदारी गर्दै विशाल योगफलमा पुर्याए ।

कप्तान जस बटलर १८ रनमा आवेश खानको बलमा बोल्ड आउट भए । उमरान मलिकको आठौं ओभरको पहिलो बलमा जेसन रोय २७ रनमा विकेटकिपर ऋषभ पन्तबाट क्याच आउट भए । रोयले २६ बलमा १ चौका र २ छक्कासहित २७ रनमा आउट भए । हर्षल पटेलले फिलिप साल्ट ८ रनमा बोल्ड आउट भए ।

युवा ब्याटर ह्यारी ब्रुक ९ बलमा ३ चौकासहित १९ रनमा आउट भए । क्रिस जोर्डन ३ बलमा १ चौका र १ छक्कासहित ११ रनमा अविजित रहे ।

भारतका स्पिनर रवि विश्रोईले ४ ओभरमा ३० रन खर्चेर २ विकेट लिए । हर्षल पटेलले ४ ओभरमा ३५ रन खर्चेर २ विकेट लिए । उमरान मलिकले ४ ओभरमा ५६ रन खर्चेर १ विकेट लिए । आवेश खानले ४ ओभरमा ४३ रन खर्चेर १ विकेट लिए ।

तीन खेलको सिरिज भारतले एक खेल अगावै जितेको छ । त्यसैको कारण आजको खेलमा जस्प्रित बुमराह, भुवनेश्वर कुमार, युजभेन्द्र चहल र हार्दिक पान्ड्यालाई बेन्चमा राखेको छ ।