काठमाडौं (हाम्रो खेलकुद) – नेपाली क्रिकेट टोलीका युवा स्टार रित गौतमले न्युजिल्यान्डमा क्रिकेट खेल्ने भएका छन् । नेपाली क्रिकेट इतिहासमा उमेर समूहमा दुई शतक प्रहार गर्ने एक्लो क्रिकेटर समेत रहेका रितले न्युजिल्यान्डको प्रमुख घरेलु प्रतियोगिता खेल्ने भएका छन् ।

रितलाई न्युजिल्यानडको गिजर सिटी क्रिकेट क्लबले आगमी ६ महिनाको सिजनको लागि टोलीमा अनुबन्ध गरेको हो । ‘म गिजरबाट खेल्ने पक्का भएको हो । न्युजिल्यान्डको प्रिमियर लेभलको क्रिकेट हो । ६ महिनाको सिजन हुन्छ । डिभिजन वान्, च्याम्पियनसिप र प्रिमियर सबैभन्दा माथिको स्तरको क्रिकेट हो’, रितले भने ।

रित अभ्यासको क्रममा हाल दिल्लीमा छन् । अभ्यासको क्रममै केहि समय अघि उनीहरुले भारतीय क्रिकेट टोलीका ओपनर शिखर धवनसँग भेट समेत गरेका थिए ।

‘यसमा न्युजिल्यान्डका ट्रेन्ट बोल्ट देखि सबै खेलाडीहरु खेल्छन् । यसमा पाँच वटा प्रतियोगिता छ । दुई वानडे, दुई टि२० र एक डे प्रतियोगिता हुन्छ । यस्मा राम्रो गर्नेहरुले प्रथम श्रेणीको प्रतियोगिता खेल्न पाउँछन्’, रितले भने ।

न्युजिल्यान्डको प्रथम श्रेणीको घरेलु प्रतियोगिता प्लेन्केट शिल्ड हो । जुन प्रतियोगिताबाट न्युजिल्यान्डको टेस्ट टोली निर्माण गरिने गर्दछ । जुन प्रतियोगिता खेल्ने खेलाडीको म्याच फि १७ सय ५० डलर छ ।

सिजन अक्टोबर देखि सुरु हुनेगर्दछ । रित भिसा मिलेको खण्डमा सेप्टेम्बरको पहिलो सातानै जाने तयारी रहेको बताए । रितले यो प्रतियोगिता खेल्ने व्यवस्था आफैंले नै लकडाउनको समयमा मिलाएको बताए । विगतको प्रदर्शनबाट प्रभावित भएपछि उनले न्युजिल्यान्डमा खेल्ने अवसर पाएका हुन् ।

‘म एकदमै उत्साहित छु । ठूलो स्तरको प्रतियोगिता हो । ठूलो अवसर हो । टेस्ट खेलाडीहरुसँग खेल्न पाइन्छ । ६ महिना सिजनपछि फर्किन्छु । मेरो मुख्य उदेश्य नेपालबाट खेल्ने हो’, रितले भने ।

‘मैले घरेलु क्रिकेटमा गलत टोली सोचे जस्तो पनि भयो । एपिएफले खेल्न बोलाएको पनि थियो । टिम सन्तुलन नमिलेर होला राम्रोसँग खेल्न पाएन । नेपालमा एक दुई खेल हुन्छ । त्यहिँ पनि खेल्न पाएपछि हराए जस्तो भयो । त्यसै गर्दा पछाडि परेको हो’, रितले भने । त्यसैमा थपे, ‘त्यहिँ भएर खेल्न जान लागेको हो । मेरो मुख्य उदेश्य नेपालबाट खेल्ने हो । नेपालमा ६ महिना पिएमकप खेल्न भन्दा उताको ठूलो लेभलको खेलेपछि धेरै फाइदा हुन्छ ।’

बागमती प्रदेशबाट घरेलु क्रिकेट खेल्ने रित पछिल्लो दुई सिजन एपिएफमा थिए । तर एपिएफमा सिनियर टोलीका खेलाडीको बाहुल्यता हुँदा खेल्ने पर्याप्त अवसर भने पाएनन् ।

‘न्युल्यिान्डको त्यो लेभलको खेल मैले यू–१९ मा पनि खेलेको छैन । नेपालको सिनियर टोलीहरुले पनि त्यो स्तरको क्रिकेट खेल्न पाउँदैन । ६ महिना अुनुभव लिएपछि मेरो करिअरमा धेरै फरक पार्छ’, उनले भने ।

नेपालको यू१९ टोलीको कप्तान बनि सकेका रितलाई एकदिवसिय क्रिकेटका भविष्य मानिदै आएको छ । उमेर समूहको प्रदर्शन अनुसार रितले सिनियर टोलीमा चाँडै स्थान बनाउने अनुमान गरिएको थियो । तर पाएनन् ।

पछिल्लो सिजन एपिएफ गएका रित सुरुवाती खेलमा राम्रो प्रदर्शन नभएपछि पुन मौका पाएनन् । एभरेष्ट प्रिमियर लिग (इपिएल) को चौथो संस्करणमा पोखरा राइनोजबाट खेलेका थिए । तर प्रदर्शन खराब रह्यो ।

रित नेपालबाट यू१६ र यू१९ अन्तर्राष्ट्रिय खेलमा शतक प्रहार गर्ने एक्लो खेलाडी हुन् । रितले एसिसी यू१९ इस्टर्न रिजन क्रिकेट प्रतियोगितामा सिंगापुरविरुद्ध १ सय १५ रन र २०१७ मा यू१६ इस्टर्न रिजनमा म्यानमारविरुद्ध १ सय ६ रनको अविजित शतकीय इनिङ खेलेका थिए । दबाबमा धैर्यताका साथ ब्याटिङ गर्ने रितको मुख्य विशेषता हो ।