एजेन्सी – भारतीय क्रिकेट टोलीका कप्तान रोहित शर्माले टि२० आई खेलमा दुर्लभ कीर्तिमान बनाएका छन् । रोहितले बिहीबार राती इंग्ल्यान्डलाई पहिलो टि२० आई खेलमा ५० रनले हराउँदै लगातार १३ खेल जित्ने पहिलो कप्तान बनेका छन् ।

रोहित टि२० आईमा लगातार १३ खेल जित्ने पहिलो कप्तान हुन् । गत नोभेम्बरमा टि२० विश्वकपपछि विराट कोहलीले कप्तानी छाडेपछि रोहितले लगातार १० खेल जिताएका छन् । यसअघि अफगानिस्तानका अस्गर अफगान र रोमाका सथीसनले लगातार १२ खेलमा जित दिलाएका थिए ।

नोभेम्बरमा न्युजिल्यान्डसँग तीन टि२० आई, फेब्रुअरीमा वेस्टइन्डिज र श्रीलंकासँगको समान तीन टि२० आई खेलको सिरिजमा क्लिनस्विप गरेका थिए । इन्डियन प्रिमियर लिग (आइपिएल) मा मुम्बई इन्डियन्सलाई पाँच पटक च्याम्पियन बनाएका रोहित शर्माबाट भारत विश्वकप उपाधिको अपेक्षा गरेको छ ।

आगमी अक्टोबर नोभेम्बरमा अष्ट्रेलियामा हुने टि२० विश्वकपमा भारतको नजर हुनेछ । रोहितलाई उपाधि जित्न त्यतिनै बढी दबाब हुनेछ । अलराउन्डर हार्दिक पान्ड्याले बलिङ र ब्याटिङ दुबैमा करिअरको उत्कृष्ट प्रदर्शन गरेपछि भारतले पहिलो टि२० आई खेलमा घरेलु टोली इंग्ल्यान्डलाई ५० रनले पराजित गर्दै तीन खेलको सिरिजमा भारतले १–० को अग्रता लिएको छ ।

जितको १ सय ९९ रनको विशाल विजयी लक्ष्य पछ्याएको इंग्ल्यान्ड १९.३ ओभरमा १ सय ४८ रनमा अल आउट भयो ।इंग्ल्यान्डका मोईन अलीले २० बलमा ४ चौका र २ छक्कासहित सर्वाधिक ३६ रनको योगदान दिए । युवा ब्याटर ह्यारी ब्रुकले २३ बलमा २ चौका र १ छक्कासहित २८ रन जोडे । क्रिस जोर्डन १७ बलमा २ चौका र १ छक्कासहित २६ रनमा अविजित रहे ।

भारतका हार्दिक पान्ड्याले ४ ओभरमा ३३ रन खर्चेर ४ विकेट लिए । त्यसअघि साउथह्याप्टनमा टस जितेर पहिला ब्याटिङ थालेको भारतले निर्धारित २० ओभरमा ८ विकेट गुमाउँदै १ सय ९८ रन बनायो ।

भारतका हार्दिक पान्ड्याले ३३ बलमा ६ चौका र १ छक्कासहित सर्वाधिक ५१ रन बनाए । यो पहिलो टि२० आई अर्धशतक हो । इंग्ल्यान्डका क्रिस जोर्डनले ४ ओभरमा २३ रन खर्चेर दुई महत्वपूर्ण विकेट लिए । दोस्रो खेल शनिबार हुनेछ ।