काठमाडौं (हाम्रो खेलकुद) – यू १९ एसिया कप क्रिकेटको खेलतालिका सार्वजनिक हुँदा सम्म पनि नेपालले खासै तयारी अघि बढाएको थिएन । नेपालले भाग लिन्छ वा लिदैन भन्नेमा पनि शंका नै थियो । तर, पछिल्लो महिना दिनयता दृश्य छिटो छिटो अघि बढे ।

देशका ६ शहरमा ट्यालेन्ट हन्ट गर्दै देशभरबाट खेलाडी छनोट गरेर तयारी सुरु भएको थियो । असम्भव जस्तै लागेको सहभागितामै खुसी मान्नु पर्ने अवस्थाका बीचमा बिहीबार श्रीलंकामा सुरु हुने एसिया कपमा आयोजकविरुद्ध खेल्दै नेपालले प्रतियोगितामा यात्रा सुरु गर्दैछ ।

श्रीलंका यात्रामा निस्कनुअघि कप्तान सन्दीप लामिछानेले टोलीमा आत्मविश्वास रहेको र सन्तुलित रहेको बताएका थिए । सन्दीपले पहिलो लक्ष्य समूह चरण पार गर्ने र त्यसपछि फाइनल सम्मको यात्रा तय गर्नु रहेको जनाएका थिए । नेपाली टोलीले समूह चरण पार गर्न सम्भावना रहे नरहेको श्रीलंकाविरुद्धको नतिजाबाट आंकलन गर्न सकिएला ।

यसै पनि नेपाल रहेको समूह ए सजिलो छैन । समूहमा भारत र मलेसिया पनि छन् । युवा टोलीका प्रशिक्षक विनोद दासले पनि कम समयमा पनि खेलाडीलाई तयार पार्ने प्रयास गरेको बताएका थिए । नेपाल यस अघि सन् २०१४ मा युएईमा सम्पन्न यू १९ एसिया कपको पहिलो चरण बाटै बाहिरिएको थियो ।